Por Europa Press / Redacción | SANTIAGO DE COMPOSTELA | 12/12/2019 | Actualizada ás 16:46
O presidente da Xunta, Alberto Núñez Feijóo, espera que o xefe do Executivo central en funcións, o socialista Pedro Sánchez, "non use" aos presidentes autonómicos para "blanquear un acordo cos independentistas". "Non creo que caia no erro de que isto (a rolda de contactos) sexa un paripé ou unha coartada para falar co señor (Quim) Torra", manifestou, tras o Consello da Xunta.
Como "primeira conclusión", Feijóo deu por feito que, se Sánchez chama aos presidentes autonómicos, o lóxico é "acudir á cita". El, pola súa banda, asegurou que levará a axenda "cos problemas de Galicia" e "o primeiro" que lle esixirá é que "pague o diñeiro que debe" á comunidade.
A Xunta demanda un total de 700 millóns de euros e o presidente subliñou este xoves que, xa en decembro, está a haber "tensións de tesouraría como nunca as había". Tamén prevé expor as dificultades de Alcoa na Mariña lucense e da planta térmica das Pontes.
O futuro das familias que viven da madeira e a seguridade das conserveiras na costa galega estarán, así mesmo, na súa carteira.
"NON DEPENDER DUN LÍDER QUE ESTÁ NO CÁRCERE"
Ao tempo, sinalou que, se Sánchez pídelle opinión sobre a investidura, a súa postura é coñecida "desde o principio". "Se quere ser o presidente de todos os galegos e españois é bo que non dependa dun líder que está no cárcere e doutro que está fuxido. A nós non nos representan nin o señor Puigdemont, nin o señor Junqueras", dixo.
Por iso, advertiu a Sánchez que, se quere ser o presidente de "todos" os españois, "non debería basearse naqueles que pública e notoriamente, incluso delinquindo, dixeron que non son españois".
"Non creo que caia no erro de que isto sexa un paripé ou unha coartada para falar co señor Torra. Espero que non use a todos os presidetnes autonómicos para blanquear un acordo cos independentistas", avisou. E é que, ao seu modo de ver, facelo sería "burlarse do Estado autonómico, dos presidentes autonómicos e de todos os galegos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.