Un párroco de Zas chama "manda de porcas" ás feministas: "As violadoras sodes vós"

O párroco de varias parroquias do municipio coruñés de Zas, Franciso Rafael Gómez-Canoura, chamou "manada de porcas" ás feministas na súa conta de Twitter nunha mensaxe que foi borrada pero cuxas capturas circulan polas redes sociais. Ademais, tamén cualificou de "imbéciles" os votantes do BNG despois de que o deputado nacionalista Néstor Rego non participase na rolda de consultas do rei Felipe VI.

"Por que teño eu que soportar que unha manda de porcas me digan 'O violador es ti'? As violadoras sodes vós que tentades forzar as nosas conciencias", publicou o pasado 12 de decembro na súa conta de Twitter o párroco Gómez-Canoura, que decidiu 'resetear' a súa conta nesta rede social.

Ese mesmo día, o cura tamén tuiteou sobre a rolda de consultas do rei Felipe VI para a investidura no Estado: "Eu son moi monárquico, máis que ningún de vós, moito máis. Pero o Rei é idiota ao designar ao Dr. Sánchez. Vai na súa contra".

Ademais, cualificou de "imbéciles" os votantes do BNG despois de que o seu deputado nas Cortes, Néstor Rego, decidise non acudir ao Palacio da Zarzuela para ser recibido polo monarca no marco da rolda de consultas para a investidura: "A deputada do BNG pola Coruña (sic) di que non se reúne co Rei porque non é unha figura democrática... Os que a votastes xa sabedes que sodes imbéciles ou queredes máis explicación?".

O PÁRROCO PIDE DESCULPAS

Este martes, tras o borrado de todas as mensaxes publicadas ata a data, o sacerdote indicou nun tuit que decidiu empezar "de cero esta nova conta, xa que algunhas cousas foron mal". Precisamente, preguntado por Europa Press sobre as súas palabras, o párroco pediu "desculpas" aos aludidos e remitiuse a outro tuit no que asegura que a reacción foi "en quente" e cualifica a súa publicación de "inapropiada e desafortunada".

"Con respecto a un tuit meu que anda polas redes, debo dicir que a súa redacción foi en quente, é inapropiado e desafortunado. Perdón a cantos se sentiron ofendidos, non era a miña intención", manifestou a través da mesma rede social este párroco, que exerce en nove parroquias da zona de Zas.

REACCIÓN DO ALCALDE

Pola súa banda, preguntado por Europa Press polas palabras do párroco, o alcalde de Zas, Manuel Muiño (BNG), cualificou de "bastante desafortunadas" as afirmacións escritas polo párroco.

"As diferentes formas de pensar, as ideas, sempre que se comuniquen con respecto caben dentro da democracia", manifestou o rexedor, que considerou que, neste caso, "insúltase" tanto ás feministas como aos votantes do BNG.

"Son insultos a persoas que pensan diferente", incidiu o político, que pediu "respecto" ao colectivo feminista e lembrou as distintas discriminacións que sofren as mulleres. "É un tema moi serio que non se debe tratar de forma banal", apuntou.

Ademais, en canto aos "insultos" propiciados aos votantes do BNG, tamén pediu "respecto" a unha decisión "entendible e respectable", como é o feito de que o Bloque Nacionalista Galego optase por non acudir á rolda de consultas co Rei Felipe VI.

"Insúltase ás persoas que optaron por unha determinada opción política, é moi desafortunado", incidiu o rexedor, que con todo, considerou que o Concello "non ten nada que pedir explicacións" xa que a quen llas debe formular é "ás propias feministas" e "ao BNG".

Tuits do párroco de Zas, Francisco Gómez-Canoura, nos que chama 'manada de porcas' ás feministas e 'imbéciles' aos votantes do BNG. EUROPA PRESS (TWITTER) | Fonte: Europa Press

ARCEBISPADO

O Arcebispado de Santiago valorou "positivamente" as puntualizacións realizadas polo presbítero de Zas en relación cunhas manifestacións "inapropiadas e desafortunadas" realizadas por el mesmo na súa conta de Twitter.

"Desde o Arcebispado apréciase esta rectificación, pois como el mesmo explicou as expresións eran inapropiadas e desafortunadas", subliñou esta institución eclesiástica.

Neste sentido, o arcebispado de Santiago reiterou o seu "compromiso pola igual dignidade entre homes e mulleres" e o seu "rexeitamento a todo tipo de violencia".