Sanidade garante a atención nas urxencias durante os "picos puntuais" da gripe
Por E.P. | SANTIAGO DE COMPOSTELA | 18/12/2019 | Actualizada ás 20:31
O conselleiro de Sanidade, Jesús Vázquez Almuiña, garantiu a atención nas urxencias e o funcionamento dos plans de resposta deseñados fronte aos picos puntuais que se pode producir polo virus da gripe.
En resposta a unha interpelación formulada pola deputada nacionalista Montse Prado, o conselleiro asegurou que os protocolos deseñados polo Sergas, "coa participación dos profesionais", "aseguran o restablecemento da normalidade en situacións puntuais de sobrecarga, comúns en todos os sistemas sanitarios e intrínsecas á natureza destes servizos".
Na súa intervención, o titular de Sanidade sinalou que, entre xaneiro e novembro de 2019, os servizos de urxencias do Sergas atenderon "956.725 pacientes". Deles, indicou que un 16,24% necesitaron hospitalización. Cifras que, conforme indicou, son parellas á de anos anteriores e "impiden falar de colapsos".
Almuiña sostivo que a entrada nos servizos de urxencia sempre está suxeita a flutuacións e a circunstancias non previstas e que a sobrecarga en situacións puntuais, como pode ser a onda anual de gripe, "é un problema universal".
En calquera caso, garantiu que os pacientes sempre son atendidos de acordo á súa gravidade clínica e certificou o funcionamento dos plans de continxencia postos en marcha para a campaña gripal.
Ademais, destacou que o Sergas reforzou con 10 efectivos e 17 postos asistenciais as urxencias do Complexo Hospitalario Universitario da Coruña (CHUAC) ante o incremento rexistrado no último ano na súa demanda asistencial.
"COLAPSO" DAS URXENCIAS
En fronte, a deputada nacionalista Montse Prado advertiu dos episodios de "colapso" que, segundo indicou, xa se rexistran nas urxencias dos hospitais galegos con "ata 30 horas de espera" nalgúns casos.
Así mesmo, preguntou ao conselleiro de Sanidade polas medidas previstas polo seu departamento para facer fronte a estas situacións que se producen cada ano na época da onda da gripe. "Teñen algún plan para que non se produzan as catástrofes de todos os anos?", preguntou.
