O PPdeG acusa a Gonzalo Caballero de "traizoar de forma reiterada a Galicia": "Só é útil para Pedro Sánchez"
Tellado reclama o pago das mensualidades do IVE e a aprobación do estatuto electrointensivo ante a situación "límite" de Alcoa.
Por E.P. | SANTIAGO DE COMPOSTELA | 20/12/2019 | Actualizada ás 16:12
O secretario xeral do PPdeG, Miguel Tellado, acusou o líder dos socialistas galegos, Gonzalo Caballero, de "traizoar de forma reiterada a Galicia" e ser "inútil" para os intereses do país e do seu partido. "Só é útil para Pedro Sánchez", apostilou.
Tellado criticou que o Grupo Socialista na Cámara "non apoiase" a iniciativa do PPdeG coa que logrou que o Parlamento de Galicia mostrase o seu apoio á Xunta na reclamación ante o Estado do pago das mensualidades do IVE do exercicio de 2017.
"É un diñeiro que se prometeu e négasenos de forma reiterada", remarcou o tamén deputado autonómico, que incidiu en que a "falta de pagamento" do Goberno a once días para que remate o ano provocou "unha situación de emerxencia finaciera" para a Adminstración galega.
E é que, segundo apuntou, "a día de hoxe" o Estado "aínda non abonou a totalidade dos 334 millóns de euros da actualización das entregas a conta" e, ademais, "retén" os 200 millóns das mensualidades do IVE e "négase a abonar" os 170 millóns que a Xunta reclama en concepto do "bo desempeño fiscal" dos exercicios de 2017 e 2018
"Desde o PPdeG vémonos obrigados a denunciar a mentira continuada na que se atopa Pedro Sánchez: mentiu cando dixo que o seu partido non se reuniría nin pactaría con Esquerra e con Bildu; mentiu cando dixo que o AVE a Galicia estaría nos tempos e prazos acordados e mentiu cando prometeu que lle pagaría ás Comunidades Autónomas o que lles debe", aseverou Miguel Tellado.
INDUSTRIA ELECTROINTENSIVA
Tamén cargou contre o Executivo en funcións que preside o socialista Pedro Sánchez pola situación da industria electroinsiva de Galicia e, en concreto, a planta de Alcoa en San Cibrao, Cervo (Lugo).
"Se o obxectivo é pechar a industria electrointensiva e botar á rúa aos traballadores, o Goberno vai na boa dirección", remarcou, antes de vaticinar que 2020 "será un ano catastrófico para a industria galega" se non existe o "compromiso" de Pedro Sánchez para aprobar un estatuto do electrointensivo que fixe prezos da enerxía "competitivos".
Nesta liña, augurou que se a aprobación do estatuto se atrasa "non haberá empresas" que se poidan beneficiar del, posto que algunhas como Alcoa na Mariña lugesa se atopa "nunha situación límite".
