A Xunta ampliará en 24 horas os prazos dos trámites en liña en caso de incidencia técnica

Esta medida "incrementa as garantías e facilidades" para cidadáns e empresas.

Por E.P. | SANTIAGO DE COMPOSTELA | 21/12/2019 | Actualizada ás 18:19

Comparte esta noticia

A Xunta enviou ao Consello Consultivo o proxecto de Decreto polo que se regula a ampliación en 24 horas hábiles dos prazos de presentación de solicitudes, escritos, comunicacións e documentos na súa sede electrónica en caso de incidencias técnicas.

Así o anunciou o Goberno galego nun comunicado aos medios, no cal sinala que esta medida "incrementa as garantías e facilidades" para cidadáns e empresas.

O Decreto establece unha ampliación automática de 24 horas hábiles en caso de incidencia técnica non programada, sempre cando impida o funcionamento normal na última hora do prazo estipulado ou durante tres horas seguidas nas doce previas a que acabase o tempo.

Segundo informa a Xunta, esta medida entrará en vigor tras a súa publicación no Diario Oficial de Galicia. Ademais, este é un dos tres decretos que o Goberno autonómico prevé aprobar no marco da Lei de Administración Dixital de Galicia (Ledixga).

Os dous restantes consisten nunha regulación do Marco galego de Competencias Dixitais, que permitirá á cidadanía e empregados acreditar os coñecementos e habilidades dixitais, e nunha modificación do rexistro de apoderamentos, que dará acceso a unha persoa ou funcionario a realizar trámites en liña en nome doutra.

INCREMENTO DO USO DOS SERVIZOS DIXITAIS

O Goberno galego explicou que a vía en liña estase "consolidando" como a opción maioritaria nos trámites coa Administración, pois entre xaneiro e setembro deste ano máis do 52% das xestións foron realizadas a través da sede electrónica, das oficinas virtuais ou do rexistro autonómico.

A Xunta sinalou que o Plan de Goberno e de Administración Dixital de Galicia, elaborado por Amtega, conta cun sistema de indicadores para avaliar a evolución do uso e implantación dos servizos dixitais, tanto por parte dos cidadáns e empresas, como a nivel interno.

Así, o Goberno autonómico comprobou que houbo un "incremento" nas notificacións electrónicas e na firma electrónica. Ademais, a través da Plataforma de interoperabilidade 'Pasaxe', os empregados poden consultar ata 72 tipos de documentos, de modo que os usuarios non teñen que presentalos.

Persoas ao ordenador
Persoas ao ordenador

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta