Por E.P. | SANTIAGO DE COMPOSTELA | 23/12/2019 | Actualizada ás 15:59
O secretario xeral do PSdeG, Gonzalo Caballero, retou o presidente da Xunta, Alberto Núñez Feijóo, a abandonar a súa "estratexia cainita" para demostrar a súa "centralidade" instando os deputados galegos do Partido Popular a facilitar a investidura do socialista Pedro Sánchez.
O xefe de filas dos socialistas galegos acusou os populares de exercer unha oposición "cainita" e de "perder o sentido de Estado". Así, criticou que "non fagan máis que queixarse" de que o Partido Socialista negocie cos nacionalistas para a investidura mentres non achegan responsabilidade para favorecer a investidura de Sánchez.
De feito, despois de lamentar que "a coalición das dereitas coa ultradereita segue sendo un problema para o país", Gonzalo Caballero criticou o discurso "falaz" sobre que os acordos para a investidura de Pedro Sánchez "pon en risco o modelo constitucional".
"Nós somos a mellor garantía da defensa da Constitución", subliñou o xefe de filas do PSdeG, que considerou que "o Partido Popular perde toda a credibilidade cando non entende que non se pode ir a terceiras eleccións e prefire seguir obstaculizando".
Gonzalo Caballero lembrou que xa van máis de "oito meses" sen que haxa un Executivo en plenitude de funcións e asegurou que "toca" que haxa "cando antes" Goberno. "Toda a axenda política está pendente de que se poida configurar un Goberno que atenda as necesidades do país", sinalou.
Neste contexto, subliñou que a "única opción" que ten condicións e os apoios para levar a cabo a investidura dun presidente do Goberno é o Partido Socialista.
"PREOCÚPANOS A ULTRADEREITA"
Tas reprobar que o PP prefira seguir "no bloqueo", Gonzalo Caballero volveu cuestionar os acordos dos populares coa ultradereita.
No caso concreto de Galicia, lembrou que Vox obtivo 100.000 votos nos últimos comicios. "Nós combateremos a ultradereita con toda a nosa forza, porque pon en risco o noso modelo de convivencia", advertiu.
Por iso, instou ao presidente da Xunta a rematar o ano "rompendo calquera vía de acordo" coa ultradereita".
GOBERNO PROGRESISTA EN GALICIA
Precisamente, preguntado pola posibilidade de que a esquerda rupturista chegue a acordos electorais para presentarse ás galegas de 2020, Gonzalo Caballero asegurou que o que lle preocupa é que tras estes comicios "haxa un goberno progresista" que "posibilite o avance, a modernización e que responda á maioría social" vista nas tres convocatorias electorais de 2019.
"É importante que a maioría social progresista que existe en Galicia alcance un goberno de progreso, porque xa sabemos que o PP vai xogar coa coalición das tres dereitas", avisou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.