Por Europa Press / Redacción | SANTIAGO DE COMPOSTELA | 26/12/2019 | Actualizada ás 15:40
A Xunta, a través da directora de Turismo de Galicia, Nava Castro, asegurou que o contrato de patrocinio do ente que dirixe co que se financia parte do festival de música O Son do Camiño conta cos "informes favorables" preceptivos.
Así o indicou en resposta a unha pregunta formulada na Comisión 1ª do Parlamento de Galicia pola deputada de Común da Esquerda, Ánxeles Cuña, que mostrou o seu receo pola adxudicación do contrato a unha Unión Temporal de Empresas que considera creada 'ad hoc' para asumir a organización do festival.
Nava Castro manifestou que O Son do Camiño é un evento "único e exclusivo", polo que o contrato de patrocinio da Xunta constitúe a mellor vía para financiar un festival "de gran éxito" e que xera "un importante retorno". Ademais, engadiu que este tipo de contrato tamén se emprega para outras citas como o Resurrection Fest de Viveiro (Lugo).
Así mesmo, lembrou que Turismo de Galicia financia "todo tipo de eventos" que van desde citas deportivas a culturais e festivas como os eventos musicais, unha escena "que se consolidou" en Galicia ao ser "diversos, integradores, creativos e impulsar desenvolvemento económico de forma equilibrada".
"Non nos opomos aos festivais de música de gran magnitude, pero queremos saber como se fai a relación contractual", incidiu Ánxeles Cuña, que considera "un escándalo e un atentado contra a cultura" que a Xunta asinase un contrato "por 6 millóns de euros" para os dous próximos anos, o que constitúe "a metade" do orzado para a Axencia Galega de Industrias Culturais nas contas da Xunta de 2020.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.