Máis de 400 nenos participarán na cabalgata de Reis da Coruña, que se inspira na maxia de Nadal

Máis de 400 nenos participarán este domingo na cabalgata de Reis da Coruña, na que intervirán máis de 150 artistas de once compañías, dúas delas internacionais, inspiradas na maxia de Nadal.

A alcaldesa Inés Rey, e a concelleira de Festas,Diana Cabanas, presentaron este venres a cabalgata, que partirá do miradoiro dos Castros ás 17,30 horas e percorrerá a avenida de Oza, Ramón e Cajal, avenida do Exército, Linares Rivas, praza de Mina, Cantón pequeno e grande e A Mariña e finalizará sobre as 20,00 horas en María Pita.

Ao rematar, haberá unha chocolatada en María Pita para todos os nenos participantes e as súas Maxestades dirixirán unha mensaxe desde o balcón do Palacio Municipal.

A edila explicou que se habilitarán cinco puntos de mobilidade reducida, cinco de atención sanitaria e dous de lactación que estarán situados no Centro Cívico de San Diego e en María Pita.

Serán en total 13 carrozas, sete de patrocinadores e seis municipais; e catro trens, un deles solidario, formado por nenos da unidade de diabetes do Chuac e da Rede Municipal de Acollida.

Os 400 nenos participantes repartirán seis toneladas de caramelos, a maiores dos doces que se lancen desde as carrozas das firmas patrocinadoras.

O responsable de Seguridade Cidadá, Carlos García Touriñán, sinalou que no dispositivo especial traballarán 132 persoas entre Policía Local, Bombeiros, Protección Civil e Cruz Vermella.