Por Europa Press / Redacción | SANTIAGO DE COMPOSTELA | 07/01/2020 | Actualizada ás 13:20
O presidente da Xunta, Alberto Núñez Feijóo, suxeriu este martes que o PSOE debería deixar aos seus deputados "liberdade de voto" na investidura de Pedro Sánchez para que "cada un vote en conciencia o que considere oportuno".
"Ameazas, ningunha; liberdade, toda", sentenciou Feijóo, tras visitar unha escola infantil en Santiago e despois de ser preguntado polas críticas de dirixentes socialistas, como Carmen Calvo, en relación ás "ameazas" recibidas antes da investidura.
Feijóo dixo que non ten coñecemento desas "ameazas" e sinalou que se a dirixente socialista ten "información" debería "denunciar". "Paréceme razoable que o faga", afirmou, para engadir que "hai momentos na vida nos que un debe votar de acordo coa súa propia conciencia".
"Hai momentos na vida nos que os partidos deixan liberdade de voto. E non é un mal momento para deixar liberdade aos deputados porque non estamos ante unha investidura ao uso, senón innovadora en 40 anos (de demoracia) e ante unha coalición que nunca se experimentou no Goberno de España", argumentou.
Neste sentido, precisou que supón que haberá "moitos socialistas que teñan dúbidas acerca de se o que van facer corresponde á historia do seu partido e dos intereses xerais de España".
Como exemplo, referiuse á entrevista que publica 'La Voz de Galicia' co exministro César Antonio Molina, na que, remarcou o presidente, este "manifesta a súa contundencia en contra do acordo de investidura".
Así, Feijóo concluíu que haberá socialistas que "están de acordo" coa coalición concretada con Sánchez e outros que non. "Ameazas, ningunha; liberdade, toda. Que cada un vote en conciencia o que considere oportuno", resolveu o presidente da Xunta, que sen embargo non suxeriu esa liberdade de voto para os deputados do PP ou doutras formacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.