A Xunta abre a convocatoria de axudas a familiares de mariñeiros falecidos
Haberá axudas de 3.000 euros para a viúva ou parella de feito da persoa falecida, así como 1.000 euros para cada fillo menor de 21 anos.
Por E.P. | SANTIAGO DE COMPOSTELA | 08/01/2020 | Actualizada ás 11:26
A Consellería do Mar abre a convocatoria deste ano para dar cobertura nos gastos máis inmediatos aos familiares de mariñeiros que falezan en accidente laboral.
Nun comunicado, a Xunta informa de que haberá axudas de 3.000 euros para a viúva ou parella de feito da persoa falecida, así como 1.000 euros para cada fillo menor de 21 anos. Está dotada con 50.000 euros e busca atender o desamparo económico puntual mentres se realizan os trámites correspondentes cos seguros.
A orde, que entra en vigor este xoves, inclúe como profesionais do mar os tripulantes galegos de calquera tipo de embarcación e pavillón, tripulantes non galegos que coticen no Réxime Especial do Mar nun pesqueiro con porto basee en Galicia, mariscadores e traballadores de viveiros flotantes en augas da Comunidade.
A presentación da orde de axudas vai do 9 de xaneiro ao 15 de decembro, e atende a persoas falecidas entre o 1 de decembro de 2019 e o 30 de novembro de 2020.
Esta é a segunda convocatoria deste tipo que realiza Mar tras a do anterior exercicio. Unha persoa terá a consideración de falecida cando leve 10 días desaparecida desde a data na que se produce o sinistro.
