O comité do 112 pide aos partidos da oposición o "rescate" do servizo

Unha representación do comité do 112 iniciou esta semana unha rolda de contactos cos grupos parlamentarios para demandar que nos seus programas para as próximas eleccións autonómicas recollan o "rescate" do servizo. Na vindeira semana manterán o encontro co resto dos partidos da Cámara galega.

Segundo explicou a presidenta do comité, Isabel Moares, o 112 "é un servizo moi sensible e ten que ser público, porque as empresas privadas van en busca de beneficio e non teñen como obxectivo mellorar a xestión das emerxencias".

Por iso, o comité entende que o servizo "debe ser xestionado directamente pola Administración, que ten que revisar e garantir o seu bo funcionamento". "Temos un problema de dimensionamento real, necesítase máis persoal e hai que mellorar e actualizar os protocolos a seguir en función de cada emerxencia, porque non sempre son claros", destacou a presidenta.

O comité reclama, ademais, que o 112 sexa "realmente unha central coordinadora de emerxencias" e "non só de información aos medios" de emerxencia. "Teriamos que poder decidir cales son os medios que hai que mobilizar, en función da emerxencia á que nos enfrontamos e non limitarnos a ser só unha canle de trasmisión", apunta.

Xunto a isto, considera que sería "moi importante" informar o conxunto da cidadanía de cales son as funcións concretas do 112, porque "moitas veces" é necesario "atender e xestionar cuestións que non son realmente emerxencias".

Reunión do comité do 112 con representantes do BNG.. CIG | Fonte: Europa Press