Presentada unha candidatura de consenso para renovar a coordinadora de Marea Atlántica
A lista ten persoas distintos grupos e partidos que xa formaban parte da Marea.
Por Europa Press / Redacción | A CORUÑA | 20/01/2020 | Actualizada ás 13:53
Unha candidatura de consenso, conformada por oito mulleres e cinco homes e coa presenza entre eles do exalcalde Xulio Ferreiro, preséntase para renovar a Coordinadora de Marea Atlántica, o órgano que se ocupa da xestión diaria da organización.
Segundo informa Marea Atlántica, a lista, denominada 'Municipalistas', foi a única que se presentou ao final do prazo previsto, o 17 de xaneiro. Xunto a Xulio Ferreiro, o órgano complétase con dous postos natos, reservados para as portavoces da Marea Atlántica no Concello, María García, e na Deputación, Alberto Lema.
Esta candidatura, avalada tamén polo órgano de arbitraxe, conta ademais con Claudia Delso, Iago Martínez, Beatriz González, Luís Hernández, Stephanie Ordóñez, Sabela Rivas, Lola Ponte, Antía Paz, Daniel Cao, Xema Rivera, Diego Jiménez e Inés Cebreiro.
Diego Jiménez e Inés Cebreiro foron, ademais, propostos para compartir a portavocía paritaria da Coordinadora. No caso de Xulio Ferreiro asumirá o labor de 'confluencia e cohesión' do espazo. Lola Ponte terá asignadas funcións de 'xustiza social' e Daniel Cao e Beatriz González serán a encargados da área de 'comunicación interna'.
Antía Paz será a responsable de 'comunicación externa e argumentario', mentres que Sabela Rivas e Inés Cebreiro asumirán 'feminismo'; Stephanie Ordóñez,'ecoloxismo'; Diego Jiménez 'movementos sociais e sociedade civil'; Xema Rivera, 'territorio'; Luís Hernádez, 'mediación e transparencia'; Claudia Delso, 'dinamización e formación' e Iago Martínez, 'relación coas institucións'.
Tras a súa presentación oficial, a candidatura deberá de ser referendada pola Rede, máximo órgano de toma de decisións da Marea Atlántica, que se reunirá nos próximos días. De producirse o apoio da Rede, o mandato da Coordinadora terá unha duración de dous anos.
