Galicia é a terceira autonomía con peor índice de exportacións en 2018
Só repuntaron en novembro un 6,6% en novembro, axudando a reducir a caída acumulada no ano.
Por Europa Press / Redacción | Vigo | 21/01/2020 | Actualizada ás 11:56
As exportacións galegas aumentaron un 6,6% en novembro en comparación co mesmo mes de 2018, segundo datos publicados este martes polo Instituto Galego de Estatística (IGE), pero no cómputo global do ano foron negativas.
No acumulado do ano, Galicia exportou por valor de 20.368,9 millóns (-4,4%), mentres importou por valor de 18.316,3 millóns (+3,9%), o que arroxa un superávit comercial de 2.052,6 millóns. De feito, Galicia é a terceira comunidade con maior retroceso entre xaneiro e novembro, só superada por Baleares (-8,9%) e Castela e León (-4,7%).
A caída das exportacións galegas contrasta coa alza do 1,4% entre xaneiro e novembro na media española, nun ano que vai camiño de nova marca en vendas ao exterior no conxunto estatal. Aínda que no mes de novembro hai unha baixada do 0,9% en España.
AUMENTO EN NOVEMBRO
con todo, o pasado mes de novembro reduciuse a caída que acumulan as exportacións galegas ao longo de 2019. As vendas ao exterior volven a terreo positivo tras a baixada interanual do 1,2% de outubro.
Galicia exportou bens por 2.110,8 millóns de euros no mes de novembro e importou por 1.712,3 millóns, o que deixa un superávit de case 400 millóns.
A venda de automóbiles supuxo a maior incidencia no incremento de novembro (cunha alza de máis oito puntos), xa que representan o 31,2% das vendas ao exterior; seguida do téxtil (+1,3%). En cambio, a maior baixada é para o ferro e o aceiro (-0,8%).
As exportacións rexistran en novembro un avance en Países Baixos (+89,4%), Alemaña (+9,7%) e Francia (+8,6%). En contraposición, diminúen as vendas a Reino Unido (-16,4%) e Italia (-2,7%).
