A axenda de Vox e a falta de estratexia do PP pon en apuros a Feijóo na época final do seu mandato

A polémica sobre o pin parental acaba de poñer de manifesto que a axenda de Vox tamén chega a Galicia. Unha polémica que incomoda, e moito, a Alberto Núñez Feijóo, que está na época final do seu mandato e xa en precampaña electoral.

A decisión dos populares de Murcia de apoiar esta proposta de Vox crea un precedente. E non só nesta autonomía, senón naquelas nas que os populares dependen ou dependan no futuro deste partido da ultradereita. Así, en Madrid, os de Abascal tamén queren aprobar esta medida e anuncian que a levarán a aquelas administracións nas que sexan chave de goberno.

Algunhas enquisas apuntan que Vox pode ser a chave dun futuro goberno de Feijóo en Galicia. Non obtivo ningún deputado en Galicia nas pasadas xerais pero logrou un 7,8% dos votos. Unha situación que, de producirse, deixaría a Feijóo nunha situación complicada. Os ultradereitistas sábeno e, de ser moi duros con el nos últimos meses, pasaron a unha nova estratexia de aproximación.

O número dous do partido de extrema dereita, Javier Ortega Smith, apuntaba nun mitin en Lugo o pasado decembro que se entran no Parlamento galego manterían "a súa máxima" de "evitar que a esquerda goberne en ningures de España". Con todo, aseguraba que non darán un "cheque en branco" ao PP galego e que pedirán, en caso de ser chave de goberno, que se cumpran "unha lista de medidas". E, entre estas medidas, estaría o famoso pin parental.

DIFERENTES MENSAXES

E, tal e como sucede con Pablo Casado, e o seu PP, tampouco no PP de Feijóo hai unha mensaxe unánime sobre esta cuestión. O propio Feijóo evitaba valorala, o seu voceiro parlamentario, Puy Fraga, puña en valor o sistema educativo galego.

Pola súa banda, a conselleira de Educación, Carmen Pomar, reivindicaba este martes a situación "pacífica, sen conflito" nas aulas galegas e destacaba os sistemas de control da educación pública galega. "E confíamos nos equipos directivos dos centros educativos e os órganos de inspección", dicía apuntando xa que a decisión non é dos pais.

Os populares tamén responden metendo a Cataluña polo medio, como fixo este pasado luns Feijóo. Unha estratexia que non lle vai servir en Galicia. De feito, esta falta de argumentos e de posicionamento político pode traerlle problemas porque todos os grupos da oposición no Parlamento de Galicia xa anunciaron medidas para coñecer se os populares galegos están a favor ou en contra.

PRECEDENTES EN GALICIA

Fontes do PPdeG apuntan que en Galicia xa hai un precedente que poría en dúbida o pin parental. Tratariase da famosa consulta aos pais sobre a lingua de escolarización dos seus fillos que Feijóo introduciu no seu primeiro mandato no coñecido como Decreto do Plurilingüismo e que, posteriormente, foi anulado polo Tribunal Superior de Xustiza de Galicia (TSXG).

Con todo, esta polémica, e outras que xurdirán estes meses se o PP cae na axenda de Vox, non son boas para Feijóo. No seu partido coinciden na necesidade de artellar un discurso propio e critican a Casado e o seu equipo por non saber reaxir a tempo. Tamén apuntan ao PSOE e a Unidas Podemos, nunha estratexia, din que trata de impulsar as mensaxes da extrema dereita para polarizar ao electorado.