En Marea pedirá saír do Mixto e que se lle recoñeza oficialmente como grupo no Parlamento galego

O ata agora deputado de Común da Esquerda Manuel Lago formalizou este luns a súa marcha do Parlamento de Galicia. O escano que deixa libre ocuparao Mariló Candedo, que pedirá a súa asignación ao grupo mixto, composto na actualidade de maneira exclusiva por membros adscritos ao partido En Marea e que, con esta incorporación, pasará a estar formado por cinco parlamentarios.

Por esta razón, segundo explicou este luns o portavoz da formación, Luís Villares, o mixto solicitará que a Mesa do Parlamento lle dea a condición de grupo parlamentario propio, xa que co ingreso de Candedo chegan ao mínimo de deputados que esixe o regulamento da Cámara para conformar grupo.

Con todo, o regulamento tamén delimita a forma en que poden ser compostos, o que, a priori, impediría a creación dun novo grupo parlamentario neste momento da lexislatura. Para Villares, o regulamento da Cámara "pensa no mixto como un grupo de deputados soltos, sen unha organización detrás".

Isto, continuou, non se produce cos actuais integrantes do mixto, fieis ao partido En Marea e que, por tanto, constitúen a súa "expresión institucional". "Merecemos a consideración institucional de grupo parlamentario", incidiu Villares, que presentou este luns a Mariló Candedo, quen terá que esperar ao pleno da próxima semana para tomar posesión da súa acta.

MANUEL LAGO

Manuel Lago non completou os trámites para a súa baixa como deputado ata este luns, cando compareceu ante a Mesa do Parlamento para informar oficialmente da súa baixa, confirmada hai sete días.

Antes de cumprir co trámite e tras participar na concentración convocada na Cámara en repulsa polo asasinato dunha muller na Pastoriza a mans da súa parella, Manuel Lago dixo estar "triste" por abandonar o Parlamento para emprender unha nova etapa en Madrid, onde exercerá como asesor da ministra de Traballo, Yolanda Díaz.

Así, sinalou que as "prioridades" do seu labor no Ministerio serán levar a cabo "políticas a favor da maioría social, actuando sobre a reforma laboral" e lograr "que o salario se achegue a unha cifra que permita vivir dignamente".

Neste sentido, destacou o acordo subscrito a pasada semana entre sindicatos e patronal para subir o Salario Mínimo Interprofesional a 950 euros nun "momento de crispación política" que, di, "tenta introducir a dereita e a extrema dereita".

No seu último día como deputado, o economista aproveitou para despedirse do presidente da Cámara, Miguel Santalices, ou o portavoz do PPdeG, Pedro Puy; con quen puido verse conversando nos corredores do Pazo do Hórreo tras o minuto de silencio.

Nese momento, o líder dos socialistas galegos, Gonzalo Caballero, achegouse a Lago para desexarlle "sorte" nas súas novas tarefas como parte do goberno de coalición entre PSOE e Unidas Podemos.

MARILÓ CANDEDO

Coa comparecencia de Lago ante a Mesa do Parlamento actívase o proceso para substituír o escano que deixa libre e que permanecerá baleiro no pleno que acolle a Cámara a partir deste martes. E é que Candedo deberá esperar a recibir a credencial de deputada para efectuar o seu ingreso como deputada e poder prometer ou xurar o cargo, o que previsiblemente se producirá no pleno da próxima semana.

Este luns, acompañada por Luís Villares, Mariló Candedo expresou que a tarefa de representar a En Marea na Cámara lle produce "unha honra inmensa" á vez que "unha responsabilidade moi grande".

A exdecana da Facultade de Pedagoxía da Universidade da Coruña (UDC) avanzou que asumirá no grupo os asuntos relacionados con educación, universidades e investigación, aínda que, como apuntou, deberá tamén atender outras áreas, especialmente cando a súa futura compañeira Paula Vázquez Verao cause baixa por maternidade nas próximas semanas.