Por Europa Press / Redacción | SANTIAGO DE COMPOSTELA | 29/01/2020 | Actualizada ás 19:48
O director xeral de Relacións Exteriores e coa UE, Jesús Gamallo, reuniuse este mércores en Lisboa coa directora xeral da Comunidade de Países de Lingua Portuguesa (CPLP), Georgina Mello, para abordar a futura e posible integración de España como Observador Asociado deste organismo.
Esta integración, explicou, suporía para Galicia "unha gran oportunidade" grazas á "intercomprensión entre o galego e o portugués". A figura de Observador Asociado aplícase a Estados nos que, aínda que non teñen o portugués como lingua oficial, existe unha comunidade de falantes de portugués de certa entidade ou, como sería o caso de España, onde unha das linguas do Estado ten similitudes e comparte orixe co portugués, como é o galego.
A Xunta mantivo "unha posición moi activa" en relación a unha posible integración de España na CPLP e explicitou este interese nos seus intercambios co Ministerio de Asuntos Exteriores, Unión Europea e Cooperación. Ademais, presentou un documento de traballo coas achegas e forma de colaboración da comunidade sobre as condicións e a maneira de formar parte desta organización internacional.
O director xeral destacou que a acción exterior cos países da comunidade lusófona supón unha "gran oportunidade no ámbito cultural", polas oportunidades de intercambios e proxectos conxuntos; e no económico, "grazas ao enorme mercado constituído por máis de 250 millóns de falantes en portugués dunha decena de países".
O Goberno galego aprobou en 2014 a Lei Paz Andrade, para aproveitar a vantaxe lingüística que supón os vínculos coa lusofonía en ámbitos como o ensino e a cultura.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.