Por Europa Press / Redacción | A CORUÑA | 30/01/2020 | Actualizada ás 18:25
O Xulgado do Mercantil número 1 da Coruña acaba de nomear á administración concursal que se encargará, se así o aceptan as persoas designadas, da xestión da pesqueira coruñesa Isidro 1952, segundo informa a CIG.
Respecto diso, explica que o comité tivo coñecemento deste nomeamento na reunión do período de consultas do ERE fixada para este xoves, "na que a dirección da empresa se negou a retirar o expediente de extinción e a modificación substancial das condicións laborais e salariais".
Ante esta situación, a central sindical explica que a representación social lembrou á dirección "que non procede manter estas medidas de recorte no contexto do concurso porque, ademais de deixar nunha indefensión absoluta as traballadoras e os traballadores, calquera decisión sobre o emprego, as condicións laborais ou a xestión económica da compañía ten que adoptarse coa aprobación da administración concursal".
"Non conforme con manter os despedimentos e a modificación, a dirección de Isidro 1952 pretendía reunirse novamente o venres co comité para pechar o período de consultas", explica. "Algo ao que a representación dos traballadores e traballadoras se opón pola súa inutilidade e pola imposibilidade de chegar a ningún tipo de acordo", recalca a central.
REUNIÓN COS ADMINISTRADORES
Tras o sucedido, a presidenta do comité de empresa, Olga Rodríguez, avanza que, en canto se confirme que os administradores concursais aceptan o nomeamento, solicitaranlles unha reunión de urxencia para abordar "cal é a situación real da empresa".
"Pór enriba da mesa un plan de viabilidade que garanta os postos de traballos e o mantemento da actividade, así como un calendario para o cobro dos salarios debidos", apostila.
Neste sentido, lembra que o persoal ten pendente de percibir "media mensualidade de novembro e todo decembro e en poucos días a esta débeda haberá que engadirlle a nómina de xaneiro".
Rodríguez precisa que tamén solicitarán unha reunión coa Xunta de Galicia "para implicala na busca dunha solución de futuro para a fábrica de Cambre, as piscifactorías e os criadeiros".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.