Unha área de 10.000 habitantes entre Corcubión e Cee queda sen pediatra tras marchar a que había a Verín

A solución para a falta de pediatras en Verín afecta, e de cheo, á comarca da Costa da Morte, que tamén está sufrindo a falta de pediatras. Así, a oferta de dúas prazas de pediatría convocadas polo Sergas para o Hospital de Verín non está sendo cuberta por novos pediatras, senón por profesionais en activo que marchan a Ourense cunhas mellores condicións que nos seus postos actuais.

Iso é o que acontece coa única pediatra que atendía a comarca de Cee e Corcubión, unha área de 10.000 habitantes que queda, agora, sen pediatra. E iso, cando por poboación, a esta zona corresponderialle dous profesionais, e non un, como ata agora. A profesional decidiu marchar, de xeito voluntario, para acollerse a nova praza de Verín na que comeza o vindeiro luns.

De feito, a falta de pediatras na Costa da Morte ameaza con grandes protestas, tal e como tamén aconteceu en Verín, e está acontecendo noutras zonas do interior de Galicia. Dumbría ten pediatra só dous días á semana, Muxía tres días, Corcubión compartía ata agora con Cee, a Picota ten un día á semana, as crianzas de Zás teñen que desprazarse a Vimianzo que ten que atender á zona de Vimianzo e Zás e en Fisterra están sen pediatría desde o 19 de xaneiro até o 19 de febreiro por vacacións do titular que non foi substituído.

Fontes do Sergas consultadas por GC din a xerencia da área sanitaria da Coruña xa conta cun profesional para cubrir a vacante de Cee-Corcubión e nega que a esta zona lle correspondan dous pediatras.

Esta situación chegou xa ao Parlamento galego. Tanto o PSdeG, coma o BNG presentaron xa distintas iniciativas a este respecto. Os socialistas piden mellorar as condicións laborais dos profesionais de atención pediátrica en Galicia, establecer un plan especial de contratación de pediatras 2018 – 2020 ou negociar co Goberno de España o aumento de prazas formativas en pediatría, e dotar dos recursos necesarios aos centros sanitarios e facultade de medicina da USC para que exista posibilidade de dar cobertura correcta a ese aumento.

Os nacionalistas denuncian a “asificación de consultas, cupos desbordados, redución de profesionais, non substitución, as listas de espera dunha semana, 10 días para o médico de familia, peche de axendas, saturacións, profesionais que ao ter que acudir a algunha urxencia teñen que deixar as súas consultas abandonadas durante horas, PACs ao limite…”.