PSdeG rexeita un consentimento "reforzado" para Verín e acusa a Feijóo de querer "silenciar" as críticas á súa xestión

O secretario xeral do PSdeG, Gonzalo Caballero, visitou este venres a quen, ao longo dos últimos meses, mantiveron un peche para protestar contra o peche do paridoiro do hospital de Verín (Ourense), que reabrirá o vindeiro luns. O dirixente socialista aproveitou para mostrar o seu rexeitamento a que a reapertura se faga cun consentimento informado "reforzado" para as pacientes.

En declaracións aos medios, Caballero puxo en valor unha mobilización de "profesionais e cidadáns comprometidos" que situou a esta localidade ourensá como "referencia da loita en defensa da sanidade pública" galega.

Ao fío desa "mobilización clara e rotunda para frear un peche para o que alegaron criterios técnicos que eran políticos, e cos que acabarían pechando todos os paridoiros comarcais", Caballero tamén criticou o intento do presidente da Xunta, Alberto Núñez Feijóo, de "calar a voz da cidadanía" mediante a circular que esixe a retirada de carteis críticos coa xestión sanitaria.

"Quere silenciar a liberdade de expresión en defensa da sanidade pública", denunciou Gonzalo Caballero, convencido de que sen eses carteis e sen a mobilización manteríase o peche decretado inicialmente pola Xunta. Así, esixiu a Feijóo que "rectifique tamén nese ataque", porque "a cidadanía e os profesionais merecen poder defender o público dos seus recortes".

"Parece que Feijóo ten medo a que fale a xente", remarcou o tamén candidato socialista á Presidencia da Xunta, crítico con que o dirixente de Os Peares "só quere a publicidade institucional da Xunta e o control sistemático dos medios públicos".