Os dirixentes do PP de Pontevedra, contra a modificación da Lei de Costas que prepara o Goberno central
Solicitan ao Ministerio de Transición Ecolóxica que lles aclare "por escrito" en que liña irá a modificación do regulamento.
Por E.P. | SANTIAGO DE COMPOSTELA | 31/01/2020 | Actualizada ás 16:32
Os alcaldes e portavoces do Partido de Popular na provincia de Pontevedra solicitaron ao Ministerio de Transición Ecolóxica que lles aclare "por escrito" en que liña irá a modificación do regulamento da Lei de Costas que ten pensado acometer.
Os populares consideran que o borrador presentado polo Goberno de España "pon en perigo e en xaque a estabilidade de moitísimas industrias e empresas que dependen exclusivamente da prórroga dunha concesión, que ata agora a Lei de Costas concedía con total criterio e normalidade e que agora, segundo os primeiros avances, xa está a xerar incerteza".
Ante a que consideran máis que posible modificación da Lei de Costas os dirixentes populares pontevedreses quixeron manifestar a súa "intranquilidade" reuníndose en Vilagarcía de Arousa. Ao encontro acudiron os alcaldes ou portavoces municipais populares de Vigo, Marín, Redondela, Sanxenxo, Oia, Baiona, Vilaboa, Poio, Bueu, Vilagarcía, Cambados, O Grove, Vilanova, A Illa, Moaña, A Guarda e Soutomaior.
POSTOS DE TRABALLO EN XOGO
Para a alcaldesa de Marín e deputada no Congreso, María Ramallo, a modificación prevista da Lei de Costas "vai afectar a un sector como o relacionado co mar que en Galicia ten unha forte carga social e no que hai moitos postos de traballo en xogo".
Os populares pontevedreses consideran que as principais incertezas que xera o borrador da modificación da Lei é saber como se contan os prazos das prórrogas das concesións administrativas. "Por casos como o que se deu en Cee estamos a comprobar que parece que hai un cambio de criterio á hora de outorgar esas concesións", sinalou María Ramallo.
A alcaldesa e deputada incidiu, ademais, no feito de que se as empresas non poden contar cun prazo amplo de concesión tampouco van poder facer plans de investimentos a medio ou longo prazo. "Neste tema non podemos estar a cambiar as regras do xogo cada ano nin cada dous anos. O mundo empresarial necesita ser capaz de saber se vai contar cunha estabilidade", abundou.
