As mulleres que poden facer exercicio intenso teñen menos risco de morrer por unha enfermidade cardíaca ou cancro

As mulleres que son capaces de facer exercicio intenso teñen significativamente menor risco de morrer de enfermidade cardíaca, cancro e outras causas, segundo puxo de manifesto unha investigación liderada polo doutor do Complexo Hospitalario Universitario A Coruña (CHUAC) e investigador do CIBERCV, Jesús Peteiro, e que foi presentada recentemente en 'EuroEcho 2019', o congreso da Sociedade Europea de Cardiología (ESC, polas súas siglas en inglés).

No traballo examinouse a capacidade de exercicio e a función cardíaca durante o exercicio e as súas asociacións coa supervivencia en 4.714 mulleres adultas que se someteron a un ecocardiograma de exercicio en cinta rodante para avaliación de enfermidade coronaria coñecida ou sospeitada.

"As participantes camiñaban ou corrían na cinta rodante, con incrementos graduais de intensidade, e continuaban ata o esgotamento, obtendo imaxes do corazón durante o esforzo", explicou o experto. O estudo definiu a boa forma física como unha máxima carga de traballo de 10 equivalentes metabólicos (METs), que é similar a subir rápido catro pisos de escaleiras ou moi rápido tres pisos, sen parar. As mulleres que alcanzaban 10 METs ou máis (boa capacidade de exercicio) comparáronse coas que alcanzaban menos de 10 METs.

Durante un seguimento medio de 4,6 anos houbo 345 mortes cardiovasculares, 164 debidas a cancro, e 203 por outras causas. Despois de axustar por factores que poderían influenciar a asociación, os METs atopáronse significativamente asociados con menor risco de morte por enfermidade cardiovascular, cancro, e outras causas.

Neste sentido, as mortes por causa cardíaca foron case catro veces maiores en mulleres con pobre capacidade de exercicio (2,2%) en comparación con boa capacidade de exercicio (0,6%).

Ademais, as mortes anualizadas por cancro foron o dobre en mulleres con pobre capacidade (0,9%) en comparación con boa capacidade de exercicio (0,4%); e os falecementos por outras causas foron máis de catro veces maiores en mulleres con pobre capacidade funcional (1,4%), comparadas coas que tiñan boa capacidade de exercicio (0,3%).

A idade media das mulleres participantes no estudo era de 64 anos e o 80 por cento tiñan entre 50 e 75. "Os resultados foron similares para mulleres por enriba de 60 e de menos de 60, aínda que o grupo de menores de 50 era escaso", recalcou o doutor Peteiro.

Con respecto á imaxe cardíaca, os investigadores mediron a función do ventrículo esquerdo durante o test de exercicio. Así, comprobaron que as pacientes con pobre función cardíaca durante o exercicio tiveron unha probabilidade maior de morte cardiovascular durante o seguimento, aínda que a función cardíaca durante o exercicio non predixo a probabilidade de morte por cancro ou outras causas.

"Mirando ambas as variables, as mulleres con función cardíaca normal durante o exercicio é improbable que teñan un evento cardiovascular. Pero se a súa capacidade funcional é pobre están aínda en maior risco de morte por cancro ou outras causas. O mellor escenario é ter ambas: función normal do corazón durante o exercicio e boa capacidade de exercicio", resolveu o investigador.