O PP ameaza con accións legais ao alcalde de Ponte Caldelas se non convoca un pleno ordinario

O Grupo Municipal do PP na Corporación de Ponte Caldelas remitiu por rexistro ao alcalde, Andrés Díaz (PSOE), un escrito mediante o que se esixe a convocatoria inmediata dun pleno ordinario.

Segundo relata o PP, finalizou o mes de xaneiro sen que tivese lugar a celebración da sesión plenaria que legalmente establece o artigo 23 da Constitución española, a lei 7/1985 de 2 de abril Reguladora das Bases do Réxime Local e o acordo plenario organizativo do 21 de xuño de 2019 mediante o que se fixaba a celebración dos plenos ordinarios un xoves cada dous meses impares.

Os populares remarcan que a non convocatoria de pleno ordinario, o "único" no que a oposición pode levar a cabo o seu labor de control e fiscalización da acción de goberno, "resulta un feito inédito" na Corporación Municipal de Ponte Caldelas e é cualificado como "moi grave desde o punto de vista de participación democrática" dos representantes da cidadanía nos asuntos públicos.

Por iso, avisan de que, no caso de que non se produza esa convocatoria de forma inmediata, procederase a actuar "con todos os mecanismos democráticos que prevé a lexislación española e as bases de Réxime Local".

O PP censura o que ve "un comportamento antidemocrático sen precedentes" e enmárcao dentro da "política obstrucionista e oscurantista" desenvolvida polo goberno de Andrés Díaz, que "entorpece ao máximo a acción de control da oposición a todos os niveis".

Tamén aseguran que resulta "curioso" que o pleno non se convoque cando o alcalde "afirma que o Concello pecha o exercicio de 2019 cunha gran cantidade de facturas non pagas e que terán que ser sometidas a recoñecemento extraxudicial de crédito e que rolda, segundo as propias cifras feitas públicas polo alcalde no seu Facebook, os 700.000 euros e que falan ás claras dunha xestión nefasta".