Por Europa Press / Redacción | SANTIAGO DE COMPOSTELA | 04/02/2020 | Actualizada ás 14:18
A dirección nacional do PP admite que aínda non hai decisión sobre candidatos ás eleccións como o caso de Alfonso Alonso no País Vasco porque aínda non se convocaron as eleccións e estase ademais á espera de ver se prospera ou non o acordo con Ciudadanos para ir xuntos ás urnas. De feito, 'Xénova' aposta por centrar a negociación con Cs en País Vasco e Cataluña porque Alberto Núñez Feijóo xa representa a 'Galicia Suma'.
Polo momento, o líder do PP, Pablo Casado, dixo onte á noite --cando se lle preguntou expresamente se Alfonso Alonso será o candidato en Euskadi-- que o galego Alberto Núñez Feijóo, o catalán Alejandro Fernández e o vasco Alfonso Alonso, que son os presidentes do PP a nivel autonómico, contan con "toda a confianza" do partido.
Casado considera que agora hai que esperar a que "pase" o congreso de Ciudadanos, que se celebra a mediados de marzo, para que ambas as formacións poidan falar "con calma" e ver "proceso electoral a proceso electoral cal é a mellor fórmula para sacar máis votos que a esquerda". Ao seu entender, PP e Cs deben "unir forzas" co obxectivo "a medio prazo" de "converxer nunha mesma plataforma" nas próximas xerais.
CIUDADANOS
A portavoz de Ciudadanos no Congreso e candidata a presidir a organización Inés Arrimadas insiste en que a súa oferta para establecer unha alianza electoral co Partido Popular pasa por materializala nas tres comunidades históricas.
Con todo, mentres ven con bos ollos unha alianza electoral en Cataluña e País Vasco, os populares descartan a fórmula 'Mejor Unidos' para Galicia, onde destacan o carácter "hexemónico" do partido que lidera o presidente autonómico Alberto Núñez Feijóo, quen aínda non desvelou se optará a un cuarto mandato.
"EGOÍSMO" DO PP
"Sorpréndeme esta postura o PP. Como en Cataluña están no grupo mixto e están moi débiles, alí si. Como aquí (en Galicia) son fortes, aquí non", manifestou Arrimadas na mañá deste martes nunha entrevista na Radio Galega, na que reiterou que a súa oferta a constituír unha alianza entre "constitucionalistas" ante a "ameaza" de que "gobernen os nacionalistas" está sobre a mesa, pero é conxunta a Cataluña, Euskadi e Galicia.
Arrimadas sinalou que nas eleccións galegas "o BNG pode subir moitísimo" e entrar a formar parte dun goberno alternativo ao PP co Partido Socialista e outras forzas. "E se por un escano gobernan os nacionalistas en Galicia? Como llo vai explicar o PP á súa xente?", apostilou a portavoz do partido laranxa nas Cortes.
Nesta liña, cre que a fórmula 'Mejor Unidos' permitirá "non perder ningún voto" das persoas "preocupadas con que en Galicia poida haber un goberno nacionalista. "A xente está preocupada e é importante que vexan que na política se move algo máis alá dos intereses dos partidos", incidiu.
Deste xeito, apelou a que o PP galego "non se deixe levar polo egoísmo" e acceda a unha coalición para as autonómicas, xa que Arrimadas descarta integrar membros de Ciudadanos Galicia nas listas dos populares para a cita coas urnas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.