"Chamamos a saír á rúa para dicirlle ao PP como está de verdade a sanidade"
A Plataforma SOS Sanidade Pública prepara a manifestación unitaria deste domingo, 9 de febreiro, en Santiago: "A única esperanza para o sistema é unha gran alianza social e sanitaria".
- Máis dun centenar de persoas maniféstanse en contra dos recortes sanitarios do Concello de Touro
- Feijóo móstrase "orgulloso" da sanidade mentres que a oposición apela á mobilización
Por Europa Press / Redacción | SANTIAGO DE COMPOSTELA | 05/02/2020 | Actualizada ás 16:00
A Plataforma SOS Sanidade Pública chama aos traballadores sanitarios, así como á poboación en xeral, a manifestarse este domingo, 9 de febreiro, en Santiago de Compostela "en defensa da sanidade pública galega". Os convocantes, que esperan unha "gran participación", apelan a secundar a protesta para "dicirlle ao PP como está de verdade a sanidade real".
A mobilización está convocada ás 12,00 horas deste 9 de febreiro desde a Alameda compostelá e, tras percorrer varias rúas da capital galega, está previsto que conclúa na Praza da Quintana.
A plataforma convocante apela a manifestarse porque a "situación sanitaria en Galicia atópase nun momento crítico" como, engade, "consecuencia das políticas de recortes, desmantelamento e privatización do sistema sanitario público galego".
Entre outros aspectos, chaman a saír á rúa a protestar pola "supresión das áreas sanitarias" e a "ocultación e maquillaxe das listas de espera", así como pola "deterioración dos dereitos laborais do persoal sanitario".
"A única esperanza para o sistema é unha gran alianza social e sanitaria en defensa da sanidade pública, universal, gratuíta, equitativa, accesible e de calidade", conclúe SOS Sanidade Pública.
