Unanimidade para que o Goberno garanta a venda de billetes nas estacións de tren

Os grupos da Cámara galega chegaron este martes a un acordo para que o Goberno garanta a venda presencial de billetes nas estacións ferroviarias de Ortigueira, Burela, Sarria, Viveiro, O Carballiño, Ribadavia, Guillarei e Redondela.

A proposición non de lei foi defendida no pleno polo deputado do PP Moisés Rodríguez, quen cualificou de "sumamente importante" este asunto e asegurou que a decisión do Goberno central, paralizada polo momento, de deixar sen este servizo a estas estacións, suporía "claro prexuízo aos veciños destes municipios".

Ademais, o parlamentario considerou que se trataría dun "retroceso" no obxectivo de vertebración territorial e da cohesión social que, segundo indicou, "debería guiar a acción de toda a administración pública".

Rodríguez lembrou que nos acordos de investidura do Goberno de coalición inclúese unha prórroga de peche do servizo nestas estacións ata o 30 de xullo. "A partir de aí os plans pasan, na maioría dos casos, por asinar convenios cos concellos para dotar de persoal de apoio e asesoramento nas estacións para a compra de billetes nas máquinas", sostivo.

"Pero, ademais, Renfe informou que hai en marcha contratos de licitación por parte do Adif para manter o servizo de venda presencial de billetes nalgunhas estacións como Carballiño, Guillarei ou Sarria, pero estamos a falar de contratos con data de caducidade que non aseguran o servizo máis dun ano", apuntou o deputado, que criticou que o Goberno central non ofreza "solucións definitivas, senón medidas provisionais".

A OPOSICIÓN APOIA A MEDIDA PERO CRITICA O PP

En fronte, todos os grupos da oposición apoiaron a petición do populares pero criticaron a súa actitude segundo quen goberne no Estado. Así, Luís Álvarez (PSdeG) avanzou o apoio do seu grupo a esta iniciativa ao considerar que se trata dunha decisión "inxusta" que afecta a moitas estacións pero sinalou que "non é un problema específico" de Galicia como o PP "pretende facer ver".

Ademais, criticou que cando o goberno do Mariano Rajoy anunciou o posible peche da venda presencial, a conselleira de Infraestruturas "defendía" na Cámara galega "solucións que agora" o PP tacha de "barbaridade".

Pola súa banda, Marcos Cal (Común da Esquerda) deu a "benvida" aos populares ao discurso "en defensa do ferrocarril". "O que pasa é que non é crible, vostedes aquí defenden o ferrocarril pero a realidade da súa acción política é que foron vostedes os desmanteladores", apuntou.

Nesta liña, o nacionalista Luís Bará mostrouse "conmovido" pola "súbita conversión" do PP "na defensa do ferrocarril" cando "son os máximos responsables da situación catastrófica da desaparición do ferrocarril en Galicia".

Por último, o deputado de En Marea Francisco Casal subliñou que o obxectivo da "cohesión territorial" debería guiar "toda actuación" da administración pública. "De verdade que nos quere contar que o seu partido fixo algo para ofrecer servizos de calidade e proximidade en Galicia? Queren contarnos que algunha vez tiveron como obxectivo a vertebración territorial do noso país"?, preguntouse.

MUSEO DA ROMANIZACIÓN DE LUGO

Por outra banda, na sesión deste mércores, foi rexeitada unha iniciativa dos socialistas galegos, a través da que a deputada do PSdeG Concepción Burgo emprazou á Xunta a "escoitar a cidadanía de Lugo" e cumprir coa súa promesa de habilitar o Cuartel de San Fernando para que poida albergar o Museo da Romanización.

Aínda que contou co apoio das restantes forzas da oposición, a medida non saíu adiante ao ser rexeitada polo grupo maioritario. En concreto, a deputada popular Encarna Amigo apostou pola creación deste museo pero "nunha infraestrutura infrautilizada" como, segundo indicaron, é o Museo Interactivo da Historia de Lugo e puxo en valor o "proxecto ambicioso" que a Consellería de Cultura presentou "hai unhas semanas en Lugo".

Imaxe do hemiciclo do Parlamento de Galicia. EUROPA PRESS - Arquivo