Sobe a compra de vivendas un 2,5% en Galicia en 2019 fronte á caída no Estado
Rexistra o cuarto maior aumento entre comunidades.
Por E.P. | SANTIAGO DE COMPOSTELA | 12/02/2020 | Actualizada ás 11:29
Galicia rexistrou un total de 16.928 compravendas de vivendas en 2019, o que supón un 2,5% máis que en 2018, un incremento que contrasta coa caída media no Estado (-3,3%), segundo os datos publicados este mércores polo Instituto Nacional de Estatística (INE).
O aumento galego supón o cuarto maior en España, tras Castela-A Mancha (+7,5%), Estremadura (+5,7%) e A Rioxa (+3,7%). No outro extremo atópase Canarias (-14%). Subiu en seis comunidades e baixou en 11.
Con todo, a Comunidade galega está á cola nas operacións por cada 100.000 habitantes, con 775, lonxe da media española, que está en 1.345. A maioría das operacións en Galicia foron de vivenda libre (16.173) e o resto de protexida (755). A maior parte é de vivenda usada (13.249) e o resto de protexida (3.679).
En canto ás vivendas transmitidas, en total foron 37.560, delas as 16.928 por compravenda, 9.242 herdanzas, 469 doazóns, 69 permutas e 10.852 operacións doutra clase.
LEIRAS TAMÉN Á ALZA
No tocante ás leiras, a transmisión crece un 5,6% en Galicia ata un total de 98.122, máis do dobre do avance co que conta España (+2,7%). O total de leiras repártese entre rústicas (26.868) e o resto urbanas, que se dividen entre: vivendas (37.560), solares (2.586) e outras urbanas (31.108).
As leiras rústica transmitíronse do seguinte modo: compravenda (7.652), doazón (401), permuta (361), herdanza (11.531) e outros (6.923). Respecto das leiras urbanas, as transmisións foron: compravenda (33.278), doazón (799), permuta (201), herdanza (15.635) e outros (21.341).
