'A vivir que son 100 anos', unha mostra científica sobre o envellecemento saudable

O Café Moderno de Pontevedra acolle 'A vivir que son 100 anos', unha exposición elaborada por Afundación, en colaboración coa Fundación Xeral de Consello Superior de Investigacións Científicas (CSIC), que está deseñada co obxectivo de ofrecer unha visión científica sobre o fenómeno da lonxevidade e do envellecemento saudable.

Este martes presentouse a mostra aos medios nun acto que contou coa presenza do director xeral da Fundación Xeral CSIC, Álvaro Giménez, quen defendeu a necesidade de proxectos coma este que "pretende contribuír a que unha sociedade como a nosa, en proceso de envellecemento, se coñeza mellor a si mesma baseándose nas últimas evidencias científicas".

Acompañouno o director-xerente de Afundación, Pedro Otero, quen se referiu á "celebración do logro que representa para a humanidade a prolongación constante das nosas traxectorias de vida", ademais dos "múltiples retos que leva o envellecemento demográfico e a necesidade de abordalos".

A exposición poderase visitar no Café Moderno de Pontevedra a partir de hoxe e ata o próximo 26 de marzo, de luns a venres en horario de 17,30 a 20,30 horas e os sábados de 11,00 a 14,00 horas e de 17,30 a 20,30 horas.

Paralelamente están programadas un ciclo de conferencias que inaugurará a científica titular do CSIC Dolores Puga o 3 de marzo, ás 19,00 horas na Sede Afundación de Pontevedra, co relatorio "La revolución de la longevidad". Continuará con 'En busca de la fuente de la eterna juventud', de Manuel Collado, xefe do Laboratorio de células nai en cancro e envellecemento do IDIS-CHUS. Será o 11 de marzo, ás 19,00 horas, na Sede Afundación de Pontevedra.

Tamén se porá en marcha un ciclo de cinema temático que inclúe as películas 'El cuarteto', que se proxectará o xoves 19 de febreiro, 'Vivir sin parar', o 25 de febreiro, e 'El exótico hotel Marigold', o 2 de marzo. Todas as sesións serán na Sede Afundación de Pontevedra, ás 19,00 horas, con entrada libre e gratuíta.

Así mesmo, do 18 de febreiro ao 26 de marzo organizaranse xornadas de portas abertas no Espazo +60 Afundación de Pontevedra nas que as persoas maiores de 55 anos terán a posibilidade de participar nunha sesión das diferentes actividades programadas, que van desde aprendizaxe de idiomas ou expresión artística ata hábitos saudables.

Tamén se organizarán actividades interxeneracionais nas que os escolares poderán compartir, dialogar e reflexionar con persoas maiores achega do envellecemento, de como os maiores afrontan esta etapa da vida e da importancia para todas as xeracións de estar conectados, comprenderse, dialogar e aprender uns doutros.

Ademais, por parte da área Educativa de Afundación deseñáronse unhas didácticas complementarias para escolares de todos os tramos de idade.

Dúas persoas maiores e xubiladas tentan disfrutar da súa vellez | Fonte: canarias7