Pillan un camioneiro co cinto de seguridade atado cunha bolsa de plástico en Vilagarcía
O home, un veciño de Ribadumia de 57 anos de idade, enfróntase a unha "elevada sanción económica".
Por Europa Press / Redacción | PONTEVEDRA | 18/02/2020 | Actualizada ás 17:05
Efectivos da Agrupación de Tráfico da Garda Civil interceptaron en Vilagarcía de Arousa un camioneiro que circulaba co cinto de seguridade atado cunha bolsa de plástico, "comprometendo gravemente a seguridade do condutor".
Así o informou o Instituto Armado, que explicou que o camioneiro foi interceptado o pasado domingo, día 16, no quilómetro 4,700, da estrada VG.-4, á altura de Baión, no municipio de Vilagarcía de Arousa.
En concreto, unha patrulla do Destacamento de Tráfico da Garda Civil de Pontevedra interceptou un camión que transportaba un tractor agrícola, "aparentemente sen ningunha medida de seguridade", sinalaron as mesmas fontes.
Ao comprobar as circunstancias da carga e constatar que, ademais de non levala perfectamente estibada, excedía algo máis do 60% do peso autorizado, a patrulla comprobou que o camioneiro circulaba co cinto de seguridade suxeito á parte superior do asento por medio dunha bolsa de plástico.
O camioneiro, un veciño de Ribadumia de 57 anos de idade, enfróntase a unha "elevada sanción económica", subliñan as mesmas fontes, polo tres infraccións cometidas e á detracción de tres puntos do permiso de conducir.
O Subsector de Tráfico da Garda Civil lembra que o cinto de seguridade representa "o medio que máis vidas humanas salvou na estrada", polo que "a súa adecuada instalación, mantemento e uso é fundamental para a seguridade viaria", conclúe.
