Santiago celebra a súa primeira 'festa fareleira' nun Entroido que terminará coa queima do 'Meco contaminante'

Santiago de Compostela quenta motores para a celebración das súas festas de Entroido, que incluirán, por primeira vez, unha 'festa fareleira' na Praza do Toural, e que concluirán coa tradicional queima do Meco que, nesta ocasión, fai referencia á contaminación e á crise do coronavirus.

O concelleiro de Festas de Santiago, Gonzalo Muíños, participou este xoves na presentación das festas do Entroido en Compostela, un acto celebrado no Teatro Principal no que estiveron representados tres grupos de entroido de referencia na cidade: Os Conformistas de Conxo, Vos Armatroulas e A Ruliña de Laraño.

A celebración arrincará o sábado, ás 20:00 horas, co desfile do Meco desde Cervantes á Praza do Toural, onde, desde o balcón do Pazo de Bendaña, presidirá as festas ata a súa queima na última xornada. Na mesma praza lerase, a continuación, o pregón, a cargo da actriz Iria Pinheiro, ao que seguirá un espectáculo musical e pirotécnico. O domingo, nunha xornada chea de charangas e animación de rúa, celebrarase o Festival Infantil de Disfraces, que terá lugar na Sala Capitol a partir das 17:00 horas.

FESTA FARELEIRA

O luns, o Entroido de Santiago vivirá, por primeira vez, unha 'festa fareleira', dedicada aos nenos pola mañá e a todo o público pola tarde, e que encherá de fariña a Praza do Toural. Tamén esa xornada haberá un taller de máscaras de Entroido no Pazo de Bendaña de 10:00 a 14:00 horas.

O gran desfile de Entroido, que sairá desde a Avenida de Ferrol ás 16:30 horas, terá lugar o día grande, Martes de Entroido, e concluirá cun concerto de Brassica Rapa e a tradicional entrega de premios na Sala Capitol, a partir das 20:00 horas. Antes, de 10:00 a 14:00 horas, o Pazo de Bendaña acollerá un taller de 'boteiros' e 'pantallas'.

O mércores pola mañá, no mesmo lugar, haberá un taller de disfraces de robots e maquillaxe e, xa pola tarde, unha "comitiva de loito" levará o Meco desde a Praza do Toural ata a Praza Roxa, onde arderá ás 21:00 horas, pondo fin ás festas.

O MECO CONTAMINANTE

O 'Meco' do Entroido compostelán este ano fai referencia aos problemas derivados da contaminación e mesmo inclúe unha chiscadela de última hora á crise actual do coronavirus.

O seu autor, Xosé Manuel Méndez, explicou que decidiu facer este 'Meco Contaminante', coroado por tres chemineas fumarentas, que camiña sobre lixo e mesmo que realiza unha vertedura; dada a "situación de emerxencia climática" que vive o planeta. Co inicio da crise do coronavirus, o autor quixo tamén facer unha chiscadela a esta actualidade engadíndolle unha coroa nunha das súas chemineas.

Como é tradicional, a figura do 'Meco' é un porco "que representa o poder que presiona" e, coa súa queima, simboliza a eliminación das cuestións que ameazan ou preocupan á poboación.