A CIG alerta de que o Sergas pretende que as ambulancias de emerxencias poidan operar "sen ningún técnico"

O responsable da Confederación Intersindical Galega (CIG) no sector de ambulancias, Óscar Graña, denunciou que o Servizo Galego de Saúde (Sergas) "pretende" que as dotacións de ambulancias de emerxencia poidan actuar "unicamente co persoal condutor, sen ningún técnico".

Tras unha reunión celebrada este xoves en Vigo con representantes do Bloque Nacionalista Galego (BNG), Graña advertiu de que esta situación leva a "comprometer a capacidade de intervención das propias ambulancias". Ademais, afirmou que "as últimas decisións adoptadas polo Sergas", entre as que se atopa a sinalada, "suporán unha maior precarización do servizo de ambulancias".

Así mesmo, o responsable sindical rexeitou que se poida substituír o servizo programado prestado mediante ambulancias "por taxis". Deste xeito, advertiu de que estes últimos vehículos non dispoñen de capacidade para "transportar unha persoa da súa cama ata o centro médico" e alertou de que a súa utilización podería "empeorar as condicións de saúde" dos pacientes.

Ante esta situación, a deputada autonómica do BNG Montse Pardo remarcou que a dotación de persoal e o tempo de resposta destes servizos "poden marcar a diferenza entre un desenlace positivo ou un fatal". "En situación de vida ou morte estes recortes supoñen unha clara ameaza", afirmou Montse Prado.

Adicionalmente, a deputada nacionalista achacou os "recortes" aplicados pola Xunta nesta área a unha aposta por "desmantelar a sanidade pública" para "alentar o negocio privado" e lamentou que o Sergas opte por contratar empresas de transporte privado que, en ocasións, "non cumpren" a normativa dado que o 061 carece das "dotacións suficientes" de ambulancias.

Ante esta situación, asegurou que o BNG impulsará a "reversión destes recortes" tras as eleccións autonómicas, que terán lugar o próximo 5 de abril.