A fenda salarial só se reduciu en 100 euros na última década

A CIG prepara mobilizacións de cara ao 8M para "visibilizar" ás mulleres que se dedican aos coidados en situación de "semiescravitude".

Por Europa Press / Redacción | SANTIAGO DE COMPOSTELA | 21/02/2020 | Actualizada ás 14:22

Comparte esta noticia

A brecha salarial entre homes e mulleres só se reduciu en 100 euros en Galicia na última década, ata quedar en máis de 4.500 euros de diferenza, un 21,4% menos.

A secretaria de Mulleres da CIG, Margarida Corral, e a economista do sindicato, Natividade López, presentaron este venres un informe da situación sociolaboral das mulleres en Galicia, no cal se sinala que esa escasa redución da brecha salarial se debe ao empeoramento do salario dos soldos dos homes, non ao crecemento no caso delas.

Este ano, a campaña da CIG para o 8M pon o foco sobre "visibilizar" aquelas que se dedican aos coidados, no marco dunha "violencia simbólica" que supón a "sobrexplotación abnegada das mulleres". O sindicato considera "urxente" lexislar para "revalorizar" estes traballos "invisibles" de traballadoras en situación de "semiescravitude".

E é que o 87% das persoas inactivas por coidados de menores ou dependentes en Galicia son mulleres. Así mesmo, o 91,6% das persoas que se acollen a unha excedencia por coidado de fillos son mulleres, mentres o 77% das excedencias por coidado de dependentes tamén son delas.

DATOS SOBRE PRECARIEDADE

A CIG realizou unha radiografía sobre o mercado laboral para detallar "a precariedade" que padecen as mulleres. Entre outros datos, recóllese que as mulleres teñen moito máis peso no tramo de salarios baixos. O 19% das asalariadas en Galicia ten ingresos inferiores a 2.197 euros.

Mentres o 22,4% das mulleres ocupadas en Galicia traballan a tempo parcial (117.000), no caso dos homes só son o 6,7%. Ademais, onde máis creceu a ocupación no sexo feminino foi nos coidados. Xunto a isto, a brecha de xénero nas pensións de xubilación é do 36,7%.

Así mesmo, o 35,9% dos contratos rexistrados a nome de mulleres duraron menos dunha semana en 2019. Todo iso, mentres a taxa de paro feminino está no 12,8% e do 10,7% entre os homes.

SEN FOLGA, PERO CON MOBILIZACIÓNS

Por tal motivo, a CIG prepara mobilizacións con motivo do 8M baixo o lema 'Invisíbeis e precarias'. Este ano o sindicato nacionalista non chama á folga porque o 8 de marzo coincide en domingo e só afectaría a unha "porcentaxe reducida" de traballadoras, ademais de incidir na "precariedade".

Por iso, a CIG asistirá a manifestacións como a que Galegas 8M convoca en Verín o próximo 1 de marzo. O propio 8 de marzo levará cabo diferentes protestas.

Así mesmo, o 4 de marzo a CIG celebrará o IV Encontro de Mulleres no edificio de Cersia, en Santiago, no que intervirán empregadas do fogar, limpadoras e traballadoras sanitarias, entre outras. Realizarán unha marcha a pé ata San Caetano para protestar ante a Xunta.

Natividade López e Margarida Curral. CIG
Natividade López e Margarida Curral. CIG | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Moisés

Margarida Corral traballou algunha vez na súa vida ?