O Tribunal Superior avala as sancións a propietarios dun edificio de Ourense por incumprir unha orde de derriba
Trátase dun edificio situado no número 10 da Rúa Pizarro polo cal o Concello sancionou os propietarios.
Por E.P. | SANTIAGO DE COMPOSTELA | 27/02/2020 | Actualizada ás 19:48
O Tribunal Superior de Xustiza de Galicia avalou as sancións impostas polo Concello de Ourense aos propietarios dun edificio situado no número 10 da rúa Pizarro, por incumprir a orde de demolición deste inmoble que se atopaba fóra da regulación.
A xunta de goberno local da cidade abordou o fallo na súa reunión deste xoves. En concreto, o tribunal estima o recurso presentado polo Goberno local declarando conforme a dereito a imposición de multas coercitivas por incumprir a orde de demolición do inmoble.
O edificio atopábase fóra da ordenación municipal, un problema que afecta a outras vivendas da cidade e que o Goberno local busca solucionar no novo Plan Xeral de Ordenación Municipal
Miguel Caride, concelleiro de Democracia Ourensana, explicou que se trata dunha cuestión "que vén de atrás" e que o novo PXOM busca "legalizar" a situación de irregularidade moitos destes inmobles.
O obxectivo do Executivo local é "evitar os prexuízos" que poida provocar unha demolición, posto que moitas obras que se realizaron na cidade fixéronse dentro dunha lexislación "que hoxe non está vixente".
