Por Europa Press / Redacción | Pontevedra | 28/02/2020 | Actualizada ás 15:42
A cidade de Pontevedra foi seleccionada pola Comisión Europea como finalista do I premio 'Seguridade Viaria Urbana', un recoñecemento internacional á redución da sinistralidade e ás medidas implementadas para implicar á cidadanía e impulsar a mobilidade sustentable. Así o anunciou este venres o alcalde de Pontevedra, Miguel Anxo Fernández Lores, que se mostrou "moi orgulloso" por este recoñecemento, no que competiu con outras 26 cidades europeas, entre as que figuraban dez españolas.
O acto de entrega celebrarase o 30 de marzo en Bruxelas con motivo dos actos programados dentro da Semana Europea da Mobilidade. Xunto a Pontevedra a Comisión Europea elixiu como finalistas ás cidades de Ordu (Turquía) e Jaworzno (Polonia).
Pontevedra foi elixida pola redución "efectiva e sostida" no número de mortos e feridos graves en accidentes de tráfico e pola súa aposta por unha "mobilidade activa" na que se priman os desprazamentos a pé ou en bicicleta.
Así, valorouse que desde o ano 2011 non se rexistrou ningún falecemento por accidentes de tráfico nas vías urbanas. Este resultado está directamente relacionado coa reforma urbana levada a cabo na cidade, así entre os anos 1995 e 1999 houbo 25 mortos en vías urbanas; 11 falecidos no período 2000-2005; 5 entre 2006 e 2011; e cero mortos no últimos nove anos.
Igualmente a evolución é significativa en canto a persoas feridas de gravidade, é dicir, aquelas que requiriren ingreso hospitalario, pasouse de 69 en 1999 a 14 no 2018.
Fernández Lores destacou que o modelo de Pontevedra é "integral" e inclúe a eliminación de tráficos "innecesarios", a recuperación dos espazos públicos para os cidadáns ou medidas para reducir a velocidade e acougar o tráfico. O alcalde insistiu en que "sería imposible" conseguir este recoñecemento sen a colaboración dos cidadáns.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.