Por Europa Press / Redacción | SANTIAGO DE COMPOSTELA | 05/03/2020 | Actualizada ás 17:31
A Secretaría das Mulleres da Central Unitaria de Traballadoras (CUT) denunciou que os servizos mínimos postos pola Xunta para a folga do 8M son "abusivos" e non os desagregaron por xénero, algo "imprescindible" neste caso.
Segundo sinalou o sindicato, o pasado mes mantiveron unha reunión do comité de folga co Goberno galego para fixar estes servizos de cara ao Día da Muller Traballadora, pero o encontro acabou "sen acordo".
A CUT, Sindicato Labrego e Sindicato Ferroviario-Intersindical foron os únicos sindicatos convocantes de folga 24 horas. Segundo este sindicato, está "exclusivamente dirixida" a mulleres para o 8M, pois "non existiu un acordo unánime" en Galicia.
Así, a CUT explicou que os servizos mínimos propostos pola Xunta non foron modificados tras o encontro. Para elas, son unha "tomadura de pelo" en casos como o das residencias públicas de maiores, xa que "van traballar máis persoas este 8M que outro domingo".
"Ou os servizos mínimos son claramente abusivos ou o resto dos días non cumpren coa legalidade explotando as traballadoras e descoidando a función social das residencias, non hai terceira opción", destacou.
O sindicato insistiu en que o Goberno galego "ten todos os domingos do ano" ás empregadas en "absolutos mínimos". Por esta situación, "reivindican con máis forza" a folga feminista.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.