"Queren facer pasar por verdugos aos defensores da lingua"
Xuízo contra 12 independentistas por organizar unha contramanifestación á marcha de Galicia Bilingüe de 2009. Contan co apoio de AGE e do BNG.
Por Galicia Confidencial | Compostela | 18/10/2012 | Actualizada ás 14:37
Un total de 12 independentistas --a maioría deles afiliados a Causa Galiza e a Nós-UP-- serán xulgados a vindeira semana por organizar unha contramanifestación a unha marcha de Galicia Bilingüe en 2009. Un proceso que os afectados cualifican de "conflito político".
A fiscalía pide para estes 12 mozos máis de 45 anos de prisión e máis de 36.000 euros por desorde pública e agresión á autoridade. "E iso por facer unha manifestación contra Galicia Bilingüe polo seu odio cara ao galego", suliñou este xoves en rolda de prensa unha das persoas que será xulgada, Aurelio López, de Causa Galiza e colaborador de Opinión do GC.
"Só por falar galego"
"Decenas de galegos entendemos que era unha provocación grandísima e quixemos manifestar a nosa desconformidade", explicou, e sinalou que se produciron "cargas" e a Policía identificou a varias persoas, algunhas delas "só por falar galego".
Por iso, entende que este proceso, obedece a un interese por "facer pasar por verdugos aos defensores da lingua". "E 12 persoas podemos entrar en prisión por defender o galego", engadiu.
"Cuestión política"
Os procesados están convencida de que este xuízo trátase dunha "cuestión política" enmarcado no "proceso de involución de liberdades democráticas" que vive Galicia "nos últimos meses". "Os cidadáns deste país que defendemos a nosa lingua estamos sentados no banco dos acusados", explicou Xoán Pérez Lourenzo, que acusou ao actual Goberno da Xunta de "política de lingüicidio".
A esta rolda de prensa acudiron, en sinal de apoio Cristina Amor, por parte de Alternativa Galega de Esquerda, e Bieito Lobeira, por parte do BNG.
O xuízo comezará o martes, día 23, ás 9.30, coa declaración dos acusados. O día 25 está previsto que declaren os membros das Forzas e Corpos de Seguridade do Estado, mentres que o día 26 será a quenda das testemuñas da defensa e da acusación, entre eles, explicaron desde Causa Galiza, membros da Falanxe e Rosa Díez, de UPyD.
