Dous novos posibles casos de coronavirus pendentes de confirmación en Galicia

Dous novos posibles casos de Covid-19 están pendentes de confirmación en Galicia Un deles está localizado en Vigo e outro na Coruña, segundo informou o conselleiro de Sanidade, Jesús Vázquez Almuiña, este sábado.

En caso de confirmarse, o número de afectados en Galicia elevaríase ata as seis persoas. Un dos casos pendentes de diagnóstico está relacionado "co brote familiar" de coronavirus que sofre unha muller de 47 anos en Vigo, a súa parella de 43 anos e o fillo dela, menor de idade.

Segundo Sanidade, este caso en estudo "pertence á contorna familiar" do tres afectados que se atopan hospitalizados no Hospital Álvaro Cunqueiro. O seu caso e o doutra persoa que está á espera de diagnóstico na Coruña analizaranse no Centro Nacional de Microbioloxía de Majadahonda.

Sobre a persoa na Coruña que podería padecer esta enfermidade, Almuiña explicou que "non está relacionado" co paciente ingresado no Complexo Hospitalario Universitario da Coruña (CHUAC) ao que se lle diagnosticou coronavirus o pasado luns e que foi o primeiro caso confirmado de Galicia.

A evolución dos xa diagnosticados precisarana durante a xornada deste sábado os facultativos do Hospital Álvaro Cunqueiro e do CHUAC, que tratan aos pacientes que continúan en illamento.

FASE DE CONTENCIÓN

Neste escenario, a Consellería de Sanidade insiste en que o virus "non está en Galicia" e que o territorio galego permanece en "fase de contención" da enfermidade. Transmitiu unha "mensaxe de tranquilidade á cidadanía" e asegura que están preparados "por se hai unha repercusión" maior ao longo dos días.

Polo momento séguense "medidas moi estritas", como as de illamento, e búscase unha "especial incidencia no diagnóstico precoz" para "tratar os posibles casos" canto antes e manter a "fase de contención".

Ademais, Almuiña subliñou a "coordinación" que existe entre o Ministerio de Sanidade e a Consellería e entre todos os departamentos da Xunta de Galicia.

Para executar esta última idea, o luns celebrarase unha comisión interdepartamental do Goberno galego para que todas as consellerías conten coa información necesaria para afrontar o virus.

Neste sentido, Almuiña cre que a "coordinación" é a fórmula que necesita tanto o contexto galego, como nacional e europeo para "conter" a enfermidade.