A CIG di que os traballadores de Correos son "persoal de risco" e pide dotalos con luvas de látex e xel desinfectante
Lamentan que as recomendacións enviadas aos traballadores tan só se refiren a xeneralidades como lavarse de forma frecuente.
Por Europa Press / Redacción | SANTIAGO DE COMPOSTELA | 09/03/2020 | Actualizada ás 12:05
A CIG remitiu un escrito á Comisión Estatal de Saúde Laboral de Madrid no que se solicita que se dote a todo o persoal de Correos de luvas de látex e xel desinfectante individual como medida preventiva fronte ao coronavirus.
Para a CIG-Correos o protocolo establecido pola empresa resulta "totalmente insuficiente", dado que tanto os carteiros como o persoal de atención ao público en oficinas non teñen opción de lavarse as mans cada vez que están en contacto con outras persoas ou obxectos.
O secretario de CIG-Correos, John Vivanco, sinala que os traballadores desta empresa pública son un colectivo de risco debido ao seu continuo contacto e proximidade co público, polo que se urxe a reforzar medidas para evitar posibles contagios.
Neste sentido, o sindicato lamenta que as recomendacións enviadas aos traballadores tan só se refiren a xeneralidades como lavarse de forma frecuente, non viaxar a lugares afectados ou manter un metro de distancia con persoas con síntomas.
