Os relixiosos suspenden todos os seus encontros de marzo ante o coronavirus

A Confederación Española de Relixiosos (CONFER) suspendeu todos os encontros programados para este mes de marzo ante a expansión do coronavirus en España e tendo en conta as recomendacións tanto do Ministerio de Sanidade como da Comunidade de Madrid.

"Lamentamos que se tivera que chegar a esta situación pero importa máis coidar a saúde que exporse a riscos innecesarios", precisou nun comunicado o secretario xeral da CONFER, Jesús Miguel Zamora Martín.

Ademais, esperan que esta suspensión "non sexa definitiva" e indican que tratarán de buscar a data máis adecuada para podelos celebrar, "se é posible". "Na medida en que vaiamos atopando acomodo aos encontros que agora se suspenden, informaremos de todo iso na páxina web da CONFER, que será a canle oficial de comunicación das decisións que se vaian tomando", subliñan.

EN RESIDENCIAS

Pola súa banda, o responsable de Acción Sindical do Sindicato de Pensionistas de Comisións Obreiras (CC.OO.) na área de Vigo, Domingo González, reclamou que a administración leve a cabo "unha inspección concreta en residencias públicas e privadas" para verificar se se prestan os servizos médicos obrigatorios tras rexistrarse contaxios por coronavirus en centros de distintas comunidades.

Así se pronunciou tras unha rolda de prensa celebrada este martes en Vigo, onde lembrou que o Covid-19 "afecta principalmente á poboación máis envellecida". Así mesmo, o sindicalista denunciou que os servizos sanitarios regulamentarios "non se prestan en moitas residencias", polo que instou a administración pública a comprobar o cumprimento da normativa. Ademais, Domingo González advertiu da posibilidade de que algúns centros de maiores non dispoñan de "servizos de prevención de contaxios" tras sinalar que "se dispararon" os casos rexistrados nos de distintas comunidades, o que provocou o peche dalgúns deles.