Coronavirus: festas e axendas suspendidas e medidas implantadas fronte ao virus

Institucións situadas en Galicia optaron por suspender actos como medida preventiva seguindo as recomendacións das autoridades para evitar contaxios por coronavirus. Fontes da Delegación do Goberno en Galicia explicaron a Europa Press que optaron, seguindo as recomendacións de Moncloa, suspender os seus actos en xeral, así como os das subdelegacións na autonomía. De feito anularon a súa axenda deste mércores.

No entanto, por parte da Delegación do Goberno explicaron que o delegado en Galicia, Javier Losada, está en contacto "permanente", tanto por teléfono como por videoconferencia, co catro subdelegados para seguir a situación. Esta decisión adoptouna tamén a Deputación da Coruña que, segundo indicaron fontes desta institución provincial, optou por anular a súa axenda. Na área sanitaria coruñesa detectáronse 20 positivos por coronavirus, dos cales sete están hospitalizados no Chuac.

Consultadas as outras deputacións galegas, explicaron por parte da de Lugo que se decidiu seguir coa axenda, pero pendentes da evolución da situación polo coronavirus, o que pode motivar outras medidas similares. No caso da Deputación de Ourense fontes desta institución aseguraron a Europa Press que "se están estudando todas as posibilidades" en relación con esta situación.

VERÍN SUSPENDE AS SÚAS FESTAS PATRONAIS

O goberno municipal do Concello de Verín, reunido de modo extraordinario, acordou a cancelación das actividades programadas no marco das festas patronais do Lázaro, ao ter unha afluencia de público superior ao mil persoas, co fin de previr contaxios.

Así o explicou o Concello nun comunicado, no que detalla que "a proximidade da fronteira co norte de Portugal, así como as particularidades na pirámide demográfica na comarca", cun 33% de poboación maior de 60 anos, motivaron "a decisión unánime" do goberno local de "pospor as celebracións centrais do Lázaro" e os eventos deportivos asociados. Suspendéronse tamén as feiras ordinarias, o III Xornadas de Novela Histórica e o II Torneo de Debate.

PECHA O CENTRO DE DÍA EN OLEIROS

A Asociación pro Persoas con Discapacidade Intelectual de Galicia (Aspronaga) pechou desde este mércores, e durante 14 días, o seu centro de día e o seu centro ocupacional de Lamastelle, en Oleiros. Así o confirmaron a Europa Press fontes da entidade, que explicaron que se fai seguindo instrucións da Consellería de Sanidade tras detectarse un caso de coronavirus dunha persoa con discapacidade intelectual.

A medida afecta a 209 persoas que fan uso destas instalacións, así como a unha media ducia de profesionais, ao ter tamén carácter asistencial. Todos eles atópanse nas súas casas seguindo os protocolos establecidos polas autoridades sanitarias, segundo precisaron as mesmas fontes. "Péchase por precaución", sinalaron desde Aspronaga, que indicaron que a medida non afecta a outros centros que hai en Lamastelle, nin tampouco aos da Coruña. "Está a funcionarse con normalidade e tomando as medidas preventivas", apostilaron.

Pola súa banda, a Escola de Idiomas da Coruña confirmou a existencia doutro caso nas súas instalacións. Nas súas redes sociais publicou na tarde do martes que unha alumna estaba afectada polo virus. Aclara que "se están seguindo as indicacións das autoridades sanitarias e educativas", mentres que remite aos consellos dados a este respecto sobre as medidas preventivas a adoptar.

DESCONVOCAN A MANIFESTACIÓN POLA SANIDADE EN VIGO

Ademais, o portavoz da Plataforma SOS Sanidade Pública na área de Vigo, Manuel González Moreira, anunciou a desconvocatoria da manifestación en defensa da sanidade pública prevista o vindeiro martes na cidade olívica para “protexer os profesionais dun posible contaxio” por coronavirus.

A presidenta da Xunta de Persoal da área de Vigo, María José Diéguez, remarcou que as reivindicacións que motivaron a convocatoria da manifestación permanencen vixentes, polo que só se decidiu aprazala. Así, incidiu en que esta medida non foi motivada por “presións” senón por “responsabilidade”.

Por esta razón, González Moreira indicou que a marcha se substituirá por unha mobilización a través das redes sociais que terá lugar o mesmo día, o 17 de marzo. Así, chamou aos cidadáns a explicar “por que a sanidade pública resulta importante para eles” e a súa experiencia respecto diso a través do ‘hashtag’ #17MpolaSanidadePública.

SUSPENDEN AS PRÁCTICAS CLÍNICAS EN HOSPITAIS

As prácticas clínicas do alumnado nos centros sanitarios e hospitais galegos quedarán suspendidas como medida de precaución ante a alerta sanitaria. Trátase dunha das medidas que recolle unha instrución que o Sergas fará público ao longo deste mércores con motivo do COVID-19, o coronavirus.

Os reitores da Coruña, Santiago e Vigo reuníronse este martes cos responsables autonómicos de Sanidade e Educación, Jesús Vázquez e Carmen Pomar, para coordinar actuacións e medidas ante a alerta sanitaria nas institucións académicas. Un dos temas que estaba sobre a mesa referíase á docencia clínica nos centros sanitarios, para adoptar un protocolo conxunto en todo o sistema universitario galego.

Aínda que nun primeiro momento as universidades galegas trasladaran que a intención era recolocar o alumnado en áreas carentes de poboación de risco para evitar contaxios, finalmente decretarase a suspensión destas prácticas, como confirmou o propio Vázquez Almuiña en rolda de prensa.

ACTIVIDADE DO CGPJ

A Comisión Permanente do Consello Xeral do Poder Xudicial (CGPJ), reunida de forma extraordinaria para facer fronte á crise do coronavirus, acordou arbitrar medidas que permitan non suspender con carácter xeral todos xuízos e declaracións xa sinaladas pese ao avance da epidemia.

Así, calquera peche ou suspensión por razóns sanitarias terá que adoptarse polo xuíz, e executarase de forma inmediata pero obtendo sempre a previa autorización do presidente do tribunal correspondente, aínda que despois cada caso obterá a posterior ratificación da Comisión Permanente do órgano de goberno dos xuíces.

IMPLEMENTO DO TELETRABALLO

Inditex comezou a implementar o teletraballo en diferentes departamentos, en especial nos traballadores da súa sede central no polígono de Sabón, no municipio de Arteixo. Segundo informan fontes da compañía, esta medida de fomento do teletraballo realízase "aos poucos" no marco do plan de contención fronte ao coronavirus posto en marcha por Inditex.

Esta medida súmase ás postas en marcha nos últimos días, como a suspensión temporal dos servizos de autobús e de ximnasio para os empregados de Arteixo. Na circular de medidas xerais da empresa contra o coronavirus, figura a restrición de viaxes e recepción de visitas "estritamente imprescindibles", así como horarios de comedor máis espaciados.