Pontevedra pecha instalacións deportivas, centros sociocomunitarios e suspende o Salón do Libro

O Concello de Pontevedra, seguindo as recomendacións das autoridades sanitarias ante a expansión do coronavirus, decretou este xoves o peche de todas as instalacións deportivas municipais e dos centros sociocomunitarios, así como a suspensión do Salón do Libro Infantil e Xuvenil e o programa de lecer xuvenil Noites Abertas.

O alcalde, Miguel Anxo Fernández Lores, anunciou que o goberno municipal tamén decidiu cancelar todas as actividades públicas ata novo aviso.

Respecto ao persoal municipal, a administración local implantará medidas de conciliación. Na medida que sexa posible instaurarase o teletraballo e o resto repartirán a xornada laboral en quendas de mañá e tarde para distribuír o traballo. Estas medidas serán acordadas cos sindicatos.

Igualmente, o concello recomendou a todas as entidades e asociacións do municipio que cancelen os eventos que teñan previstos para os próximos días a fin de evitar factores de risco de contaxio. En función da evolución do coronavirus tamén se avaliará suspender feiras e mercados.

Fernández Lores apelou á "conciencia colectiva" da poboación porque "que se supriman as clases e pechen os centros non é para que despois a xente se bote á rúa ás toas".

O alcalde de Pontevedra, médico de profesión, sinalou que os cidadáns deben lembrar que "ninguén ten inmunidade" e que todos somos "susceptibles" de contraer a enfermidade, polo que é responsabilidade "de todos" evitar que aumente o pico de contaxio e atrásese a curva de evolución do coronavirus.