A Xunta pide máis equipos de protección para os servizos de emerxencia e Protección Civil

O vicepresidente da Xunta, Alfonso Rueda, solicitou ao Goberno central máis Equipos de Protección Individual (EPIs) para dotar os servizos de emerxencia e as agrupacións de Protección Civil e que poidan así realizar o seu traballo "con todas as garantías ante a epidemia do coronavirus".

Así o indicou a Xunta nun comunicado de prensa, no que explicou que esta petición lla trasladou este luns ao ministro do Interior, Fernando Grande-Marlaska, con quen mantivo unha videoconferencia pola tarde xunto cos conselleiros do resto de comunidades autónomas e delegados do Goberno.

No encontro, Rueda tamén solicitou outras aclaracións como o peche da fronteira con Portugal, "moi relevante para Galicia", matizou a Xunta, "pola gran actividade que se desenvolve ao redor da raia".

Así mesmo, o vicepresidente galego aproveitou para trasladar a postura de Galicia sobre a necesidade de manter abertos os talleres mecánicos, que "realizan un labor fundamental para manter operativos outros servizos básicos, como os de emerxencia, transporte ou urxencia sanitaria", concretou a Xunta.

O vicepresidente galego nunha reunión este luns co ministro do Interior e outros conselleiros e delegados do Goberno.. XUNTA | Fonte: Europa Press