Galicia rexistra o maior incremento do custo laboral pero está 222 euros por baixo da media

O custo laboral medio por traballador e mes (que inclúe as remuneracións e as cotizacións sociais) subiu un 4,8% no cuarto trimestre de 2019 en Galicia en relación ao mesmo período do 2018, ata alcanzar os 2.533,47 euros.

Deste xeito, Galicia rexistrou o maior incremento por comunidades, máis de dous puntos por encima da media española (+2,3%), segundo os datos publicados este martes polo Instituto Nacional de Estatística (INE).

Con todo, o custo laboral de Galicia quedou 221,7 euros por baixo do conxunto do estado (2.755 euros) e sitúase no noveno posto como máis alto por comunidades. Está lonxe dos 3.258 euros cos que País Vasco se atopa á cabeza.

O custo laboral por hora efectiva na autonomía é de 19,75 euros (+4,2%), aínda que é de case dous euros menos que a media, situada en 21,56 euros (+2%).

Do total do custo laboral, o custo salarial (que comprende todas as remuneracións, tanto en metálico como en especie) alcanzou os 1.896 euros de media en Galicia no cuarto trimestre do ano, un 4,4% máis que en idéntico período de 2018. A media estatal incrementouse un 1,8% e situouse en 2.075 euros.

Pola súa banda, no cuarto trimestre do ano pasado, outros custos (custos non salariais) subiron un 5,9% na Comunidade, ata os 637 euros. Aínda está por baixo da media, de 679,7 euros.

De outubro a decembro, as horas pactadas por traballador e mes foron 151 en Galicia; as horas efectivamente traballadas foron 128,3; e as non traballadas, 23,5 horas.

Os traballadores a tempo completo tiveron 169,1 horas pactadas, 143,2 efectivas e 26,7 non traballadas. Pola súa banda, os traballadores a tempo parcial tiveron 85,7 horas pactadas; 74,5 horas efectivas e 12 horas non traballadas.

VACANTES

Galicia situouse como a sétima comunidade con maior número de vacantes -- demanda insatisfeita de man de obra--, cun total de 4.607. Á cabeza está Madrid, por encima das 21.000; seguida de Cataluña, que roza as 20.000.

Con todo, a maioría das unidades produtivas contestan que non teñen vacantes porque non necesitan ningún traballador máis, mentres un pequeno grupo achácao ao elevado custo de contratación.

O custo laboral ao peche de 2019 por comunidades. EPDATA | Fonte: Europa Press