Adolfo Domínguez activa un ERTE para 728 empregados ata maio ao pechar 188 tendas, 18 delas en Galicia

A marca optimiza a actividade do seu centro loxístico en San Cibrao das Viñas (Ourense) para os pedidos en liña.

Por Europa Press / Redacción | SANTIAGO DE COMPOSTELA | 17/03/2020 | Actualizada ás 18:06

Comparte esta noticia

Adolfo Domínguez activou un Expediente de Regulación Temporal de Emprego (ERTE) que afectará 728 empregados tras o peche das súas 188 tendas en España desde a declaración do estado de alarma debido á situación xerada polo coronavirus. En concreto, as tendas afectadas en Galicia por este ERTE son un total de 18, entre os diferentes puntos de venda que inclúen tamén os outlet e espazos en El Corte Inglés.

Adolfo Domínguez.
Adolfo Domínguez. | Fonte: RTVE

En concreto, o ERTE dará cobertura aos empregados españois, que representan un 61% do persoal do grupo de moda, ata o mes de maio, no caso de que o peche dos puntos de venda teña que prolongarse.

Os profesionais da rede comercial poderían reincorporarse aos seus postos de traballo cando a rede de tendas poida reabrir con seguridade, segundo explicou a firma de moda.

"A protección dos nosos clientes e profesionais é a nosa máxima prioridade. Reforzamos áreas que nos permiten ser o máis rendibles posible ata que podamos reabrir as nosas tendas e volver á actividade habitual", resaltou o director xeral de Adolfo Domínguez, Antonio Puente.

A regulación afecta só a empregados españois, aínda que a compañía tamén se viu obrigada a pechar tendas propias e franquías noutros países como China, Francia, Perú e Kuwait.

Neste contexto, Adolfo Domínguez reforza a súa venda 'en liña para garantir o envío de pedidos aos seus clientes e subministración aos seus mercados internacionais ante a expansión do coronavirus.

REFORZO EN LIÑA EN SAN CIBRAO DAS VIÑAS

A marca optimiza a actividade do seu centro loxístico en San Cibrao das Viñas (Ourense) para reforzar o servizo aos seus clientes en liña, á vez que impulsa o seu servizo de venda telefónica.

Desta forma, o comercio electrónico e a atención aos mercados internacionais convértense no principal obxectivo de todos os profesionais de servizos centrais da firma, o 54% dos cales teletraballan, durante o período de peche dos establecementos en España.

A venda telefónica, dispoñible a través dun número gratuíto, será atendida por estilistas da firma. A venda 'en liña' é unha das pancas de crecemento da compañía nos últimos dous anos, cun aumento do 70,1% no exercicio fiscal 2018-2019.

O grupo Adolfo Domínguez, que conta cunha rede de 188 tendas en España e mantén outros 186 puntos de venda abertos en 16 países, facturou 112 millóns de euros no último exercicio completo.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta