Nova protesta de StopDesahucios Compostela

O BBVA está detrás dun novo desafiuzamento dunha familia compostelana. StopDesahucios Compostela púxose en contacto a pasada semana con este banco para tentar deter este proceso, pero ata o momento non tiveron resposta da entidade.

Por iso, un grupo de activistas concentrouse este martes diante da sucursal que este banco ten no barrio de Conxo, en Santiago, para intentar a paralización deste desafiuzamento. 

"Botalos á rúa"

"Unha vez máis os bancos non están pola labor de negociar coas persoas e familias e prefiren botalas á rúa deixándolles a débeda de por vida", sinalan desde esta platafomra

"É absolutamente inmoral que se sigan rescatando bancos e non persoas. Dación en pago e alugueiro social para estes casos XA! É de xustiza", asegura Rubén Cela, líder do BNG en Compostela, que tamén acudiu á concentración.

Mobilizacións

 

Nos últimos días producironse varias mobilizacións sociais en contra dos desafiuzamentos tal e como contamos no GC. O pasado venres, un grupo de persoas conseguía parar o desaloxo dunha familia en Ferrol e este luns en Vigo varios afectados polos desafiuzamentos conseguiron paralizar o pleno municipal e increparon aos concelleiros vigueses xunto con varios traballadores despedidos do Instituto Municipal dos Deportes de Vigo (IMD).

 

Tres veces máis

En Galicia producíronse máis de 3.000 desafiuzamentos no que vai de ano, o triplo que no mesmo período de 2011. As provincias máis afectadas durante o primeiro semestre do ano son Pontevedra (1.257 desafiuzamentos) e A Coruña (1.168), seguidas de Lugo (326) e Ourense (286).