Detido un repartidor a domicilio por vulnerar as restriccións do estado de alarma na Coruña
Un total de dez persoas foron denunciadas na cidade por permanecer en espazos públicos en supostos prohibidos.
Por Europa Press / Redacción | A CORUÑA | 19/03/2020 | Actualizada ás 14:18
A Policía local informou este xoves da detención dun repartidor a domicilio na Coruña que foi detido por vulnerar as restricións do estado de alarma decretado por mor da crise sanitaria do coronavirus e ao que se lle atribúe desobediencia á autoridade, "resistencia grave" e "ameazas" a axentes, tras ser apercibido mentres participaba "nunha reunión prohibida na vía pública" con outros repartidores.
Nun comunicado, a Policía local informa de que, ás 16,30 horas do día 17, por parte dos compoñentes dun vehículo patrulla de zona, procedeuse á detención dun home de 27 anos de idade e de nacionalidade brasileira, acusado dun concurso dos delitos de desobediencia, resistencia e ameazas.
Sobre as 16,20 horas desa xornada, os policías foron comisionados pola Sala Operativa do 092, servizo onde recibiran un requirimento cidadán informando de que na Praza de Pontevedra estaba a desenvolverse unha reunión de repartidores a domicilio.
Personado o coche patrulla no lugar da denuncia, atopáronse con catro repartidores en motocicleta, motivo polo que os actuantes lles informaron que dado o estado de alarma decretado, podían exercer a súa actividade profesional pero non podían estar reunidos en grupo na vía pública.
Segundo explica a Policía, tres dos repartidores asumiron a súa responsabilidade pero un deles desobedeceu os requirimentos manifestando que el ía permanecer no lugar mentres os increpaba con frases como "ides deixar moita xente sen comer".
INSULTOS E INTENTOS DE GOLPEAR
Tras solicitarlle a súa documentación, así como a da motocileta, a Policía relata que empezou a insultar e increpar os axentes, tentando obstruir o labor policial, "pretendendo amedrentarlos achegándose a eles, gritando e realizando movementos bruscos cos seus brazos á altura do rostro dos axentes".
Todo iso, "sen manter a mínima distancia de seguridade regulamentaria, pondo en risco a integridade deles, chegando a lanzarlles golpes que foron esquivados en diferentes ocasións". Por este motivo, sinalan que se procedeu á súa detención e o repartidor tentou "fuxir" ofrecendo, ademais, "forte resistencia á detención".
O detido foi trasladado a dependencias policiais, onde ingresou en calabozos ata a súa posta a disposición do xulgado de garda. Os outros tres novos que o acompañaban foron denunciados administrativamente por participar nunha reunión prohibida en espazo público.
DEZ DENUNCIAS
Estes mozos están entre os dez denunciados por incumprir as restricións derivadas do estado de alarma, por parte da Policía local na Coruña, ante a Subdelegación do Goberno.
Nun comunicado, a Policía informa de que empeza unha segunda fase de execución incorporando mensaxes luminosas nos paneis informativos nas vías públicas da cidade e nos vehículos policiais que dispoñen de 'leds' luminosos, así como coa emisión de mensaxes de megafonía desde os vehículos policiais informando das restricións impostas á libre circulación de persoas e vehículos e das consecuencias do seu incumprimento.
A pesar das denuncias tramitadas, agradece que "a gran maioría dos cidadáns" toma conciencia da emerxencia sanitaria na que está inmerso o país, cumpra as normas e quede confinada nas súas vivendas.
Tamén destaca a "gran colaboración" que está a prestar a cidadanía mesmo coa achega de stocks de produtos de autoprotección (alcol, luvas protectoras e máscaras, por exemplo). "Nestes momentos sonnos de gran axuda debido ao estancamento da fabricación e venda destes produtos imprescindibles para levar a cabo o noso labor con seguridade e eficiencia", conclúe a Policía local.
