Unha monxa contaxiada na Cociña Económica de Santiago mantén a parte do persoal en corentena
Decidiuse non utilizar a cociña e botar man dun cáterin para continuar coa repartición da comida desde este sábado.
Por Europa Press / Redacción | SANTIAGO DE COMPOSTELA | 21/03/2020 | Actualizada ás 20:12
Parte do persoal da Cociña Económica de Santiago de Compostela atópase en corentena despois de que unha monxa que colabora na institución dese positivo nas probas do COVID-19.
No entanto, segundo confirman a Europa Press fontes deste centro, o seu servizo continúa con outros traballadores e a comida que reparten aos centos de usuarios diarios elabórase, polo momento, nun cáterin.
O positivo da relixiosa, que se atopou mal días atrás, coñeceuse este venres pola mañá e o Concello de Santiago, co que a Cociña Económica contactou ao momento, procedeu á desinfección pola tarde.
Tras iso, decidiuse non utilizar a cociña e botar man dun cáterin para continuar coa repartición da comida desde este sábado. Iso si, o persoal que mantén activa a institución traballará agora "con máscaras e luvas, contando con todas as precaucións", aseguran as mesmas fontes.
