Ibuprofeno e coronavirus: isto é o que din os expertos sobre a súa relación

A polémica ao redor do ibuprofeno e o coronavirus foi suscitada hai unha semana por Oliver Véran, ministro de Sanidade do país francés, que asegurou a través dun tweet que "tomar medicamentos antiinflamatorios (ibuprofeno, cortisona...) podería ser un factor no empeoramento da infección". Recomendaba, pois, tomar paracetamol no caso de ter fiebre e consultar co médico se o paciente xa se estaba medicando con antiinflamatorios.

A raíz destas declaracións, a propia Organización Mundial da Saúde (OMS) saíu ao paso tamén a través de twitter para afirmar que non se coñecen efectos negativos do ibuprofeno sobre o coronavirus. Polo tanto, non desaconsella o seu uso. En concreto, a OMS sinalou o seguinte: "Sobre a base da información da que se dispón actualmente, a OMS non recomenda que non se utilice o ibuprofeno. Estamos consultando a médicos que tratan COVID-19 e non coñecen informes de ningún efecto negativo do ibuprofeno máis alá dos habituais que limita o seu uso en certos grupos. A OMS non coñece datos clínicos publicados sobre este tema".

Tamén a Axencia Española de Medicamentos e Produtos Sanitarios (AEMPS), dependente do Ministerio de Sanidade de España, asegurou que "non existe ningún dato actualmente que permita afirmar un agravamento da infección por COVID-19 co ibuprofeno ou outros antiinflamatorios non esteroideos".

EN ESTUDO

Así pois, consideran que "non hai razón" para que os pacientes que estean en tratamento crónico con estes medicamentos o interrumpan. Con todo, deixan a porta aberta a unha posible relación que se mantén en estudo: "É un sinal que está en avaliación para toda a Unión Europea no Comité de Avaliación de Riscos en Farmacovixilancia a solicitude da axencia de medicamentos francesa (ASNM)", indican no comunicado.

Esta análise non finalizará, previsiblemente, ata maio de 2020, adverten. Por iso, coa información dispoñible, ven "complexo" determinar se esta asociación existe, xa que o ibuprofeno se utiliza para o tratamento dos síntomas iniciais das infeccións, e polo tanto, a relación causa-efecto "non é tan fácil de esclarecer".

As fichas técnicas dos medicamentos que conteñen ibuprofeno indican que este fármaco pode enmascarar os síntomas das infeccións, cousa que, á súa vez, podería retrasar o seu diagnóstico. Con todo, segundo indican dende a axencia, isto acontece coas infeccións en xeral, non especificamente co coronavirus.

RECOMENDACIÓN DE PARACETAMOL

Por este mesmo motivo, a axencia indica que as guías recomendan o uso de paracetamol para o tratamento sintomático da febre como primeira alternativa. Mais deixa claro que tampouco hai ningunha evidencia que contraindique o uso do ibuprofeno para síntomas menores. En calquera caso, os medicamentos deben ser utilizados en base á ficha técnica e á menor dose capaz de controlar os síntomas.

A AEMPS indica tamén que seguirá informando perante calquera nova información sobre este asunto.