Extremoduro deixa no aire o concerto en Santiago: "Non temos nin puta idea de que vai pasar coa xira"

Extremoduro difundiron este xoves un comunicado no que aseguran que agora mesmo non saben "que vai pasar coa xira" de despedida que teñen previsto iniciar en Valencia o 15 de maio e dentro da cal tamén programaron unha cita en Santiago de Compostela, o 13 de xuño.

"Queremos dicirvos que non temos nin puta idea de que vai pasar coa xira. O único que sabemos con absoluta certeza é que nós imos tocar. En maio, no verán, en setembro, o ano que vén ou cando sexa. Pero imos tocar por collóns", afirma o grupo nun comunicado recollido por Europa Press.

E engaden: "Nós estamos encerrados en casa e ensaiando con gravacións que temos feitas dos ensaios. Tocando máis que nunca e esperando que todo se arranxe pronto. Quedade na casiña e tentade levalo o mellor posible. Tentade ver o lado bo. Sempre o hai. Bicos e abrazos".

Este comunicado de Extremoduro chega horas despois de que o Concello de Rivas Vaciamadrid, onde teñen previstos catro concertos en xuño e xullo ante 150.000 persoas, anunciase que apraza ata setembro calquera tipo de acto e festividade que supoña reunión de persoas.

Á parte dos concertos en Rivas, a xira de Extremoduro ten datas tamén o 15 e 16 de maio no Auditorio Marina Sur de Valencia, o 22 e 23 de maio en La Finca de Murcia, o 30 de maio no Estadio de La Cartuja de Sevilla, o 13 de xuño en Monte do Gozo de Santiago de Compostela, o 20 de xuño no Recinto Feiral de Cáceres, o 26 e 27 de xuño no Parc del Fórum de Barcelona e o 18 de xullo en Kobetamendi, Bilbao.

O recinto compostelán de Monte do Gozo ten programado para o mes de xuño outras citas multitudinarias, como o festival O Son do Camiño --os días 18, 19 e 20-- ou o concerto de Marc Anthony --o 21 de xuño-- que, polo momento, non foron aprazados a causa do coronavirus.

Extremoduro | Fonte: Ruben Ortega - Wikipedia.