117 afectados por coronavirus en residencias, 92 maiores e 25 traballadores
Aumenta en número de afectados de persoal traballador. Agora son un total de 16 empregados os que foron diagnosticados na residencia de Celanova, dúas máis que o mércores
Por Europa Press / Redacción | SANTIAGO DE COMPOSTELA | 26/03/2020 | Actualizada ás 17:57
Os casos positivos de coronavirus en residencias para a terceira idade en Galicia crecen ata os 117 diagnósticos, sete máis que no último boletín oficial da pasada xornada ás 21,00 horas.
Segundo a Consellería de Política Social este xoves rexístranse ata 92 maiores e 25 empregados afectados, uns números que aumentan en catro persoas usuarias e catro traballadores as cifras de onte.
As residencias nas que se coñeceron novos casos de COVID-19 nas últimas horas son as de DomusVi Barreiro de Vigo (cun total de 35 diagnósticos positivos, dous máis que onte), a residencia O Portazgo da Coruña (12, tres máis que onte), en Fogar Nosa Señora do Carmen en Fisterra (1) e na nosa Señora de Valvanera de Cambados (1).
Á súa vez, a Consellería informou da morte de dúas persoas maiores que padecían esta enfermidade vírica, unha delas na Residencia San Carlos de Celanova (Ourense), que agora conta con 12 casos activos; e outra da Fogar Bellolar (A Coruña), que rexistra dúas persoas infectadas.
Os outros centros nos que se coñecen casos de persoas contaxiadas son: DomusVi San Lázaro de Santiago (15), DomusVi Cangas (4), A nosa Señora de Fátima no Barco de Valdeorras (3), A nosa Señora da Esperanza en San Rosendo en Ourense (3) e un caso positivo na nosa Señora da Asunción en Caldas de Reis, Castro Caldelas, Viveiro e Carballo.
TRABALLADORES
Por outra banda, tamén aumenta en número de afectados de persoal traballador. Agora son un total de 16 empregados os que foron diagnosticados na residencia de Celanova, dúas máis que o mércores. Igualmente, persoal da DomusVi de Barreiro (6), da nosa Señora da Esperanza de Ourense (2) e da DomusVi San Lázaro tamén rexistra contaxiados.
En canto aos Centros de Atención para Persoas con Discapacidade (CAPD), estes tamén empezan a contabilizar os casos positivos en Aspronga, Redondela, Aixiña e Santa Cruz de Rosendo. Un total de 15 afectados, á vez que tamén o están 4 traballadores, 3 de Redondela e un da Vivenda Tutelada Ágora, de Monforte de Lemos.
UME
A Unidade Militar de Emerxencias (UME) levou a cabo este xoves labores de desinfección nas residencias de maiores dos municipios coruñeses de Carballo e Oleiros.
Precisamente na de Carballo detectouse a pasada xornada de mércores un caso positivo de coronavirus, que se suma aos 92 usuarios que a día de hoxe están diagnosticados en Galicia.
Un día despois, esta unidade militar pasou por esa residencia e pola de Oleiros a desinfectar a zona; como tamén se fixo noutras residencias de anciáns de toda a Península.
