Ence, Alcoa, Endesa e reparacións de Navantia manteñen a actividade mentres a maioría da industria para

Ence, Alcoa, Endesa, reparacións en Navantia, a planta de Gamesa en Sigüeiro e Reganosa son algunhas das principais empresas que manteñen a actividade en Galicia mentres a maioría da industria para debido ao estado de alarma, que só permite a produción de industrias esenciais. Así o comunican as diferentes empresas consultadas, mentres as compañías ligadas á alimentación e bebidas como Feiraco, Estrela Galicia e conserveiras como Calvo, entre outras, continúan en marcha coas pertinentes medidas e protocolos de hixiene.

Na fábrica de Ence na ría de Pontevedra opérase con "total normalidade", aínda que se estableceron quendas na pasteira para que non estea xunto máis do 12 por cento do persoal. Previamente, xa realizaban teletraballo todos aqueles que podían en administración.

En Alcoa, trabállase tamén con "normalidade" este martes en San Cibrao tras a xornada do luns marcada pola incerteza ata que a empresa conseguiu confirmación do Goberno para manterse como esencial. Fontes da compañía explican que se trasladou ao Ministerio de Industria que "non se pode parar dun día para outro" nas fábricas de aluminio e alúmina, dado que se trata dunha "produción en continuo moi complexa" con cubas de electrolisis.

Pola súa banda, no caso de Gamesa mantense a planta de arranxos de multiplicadoras en Sigüeiro, no municipio de Oroso, por se se estragan pas en aeroxeradores. En cambio, péchase a fábrica das Somozas ata que termine o estado de alarma. En Galicia, a compañía tamén mantén traballando a técnicos de mantemento, así como a persoal de administración en teletraballo.

A planta regasificadora de Mugardos está a operar co persoal de operación e mantemento de Reganosa nas instalacións, mentres que o de oficina faino a través de teletraballo.

No caso Endesa, nas Pontes, tanto en carbón como gas está a operarse co 40 por cento do persoal nas instalacións, mentres que o persoal restante traballa ou ben desde a súa casa ou mantense localizable en caso de necesidade.

Doutra banda, as actuacións que se están realizando na central para adaptarse ás novas esixencias ambientais tiveron que paralizarse, dado que as obras deste tipo non se consideran actividades estratéxicas e non é un traballo de operación da empresa.

A actividade eólica da compañía tamén segue en funcionamento, con máis dun cento de persoas, tanto en operación e mantemento como de oficinas teletraballando.

A empresa mantén despregado un plan de protección e seguridade ademais dun seguro específico de hospitalización para casos de contaxio de COVID-19.

Navantia, pola súa banda, limitou o traballo ao estritamente necesario na comarca de Ferrolterra, pero de momento mantén operativa a súa actividade de reparacións en barcos militares para atender o estado de emerxencia.

A empresa naval atópase en conversas coas organizacións sindicais sobre o escenario aberto ante as novas medidas aprobadas polo Goberno central.

Precisamente, CC.OO Industria-Ferrol emitiu un comunicado no que esixen á empresa rectificar a suspensión de contratos de limpeza e seguridade, e pediu que tanto Acciona como Prosegur retiren os ERTEs presentados ao tratarse dunha actividade esencial.

SECTOR ALIMENTACIÓN

Pola súa banda, no sector da alimentación en Estrella Galicia continúa funcionando coas permitentes medidas de seguridade e hixiene. Con todo, Cerveceros de España xa avisou do impacto do coronavirus no sector cunha baixada da demanda.

CLUN (Cooperativas Lácteas Unidas) mantense a pleno rendemento, con todas as medidas de seguridade (proteccións individuais, distancia en postos de fabricación, etc.). A súa división láctea centra a súa actividade na recollida, envasado e distribución de leite e outros derivados lácteos, baixo as marcas Únicla, Clesa, Feiraco e Arquega.

A cooperativa conta con máis de 3.000 socios e recolle de granxas situadas en 30 municipios concentrados nas áreas de influencia das comarcas coruñesas de Santiago, Ordes, Arzúa, Melide e A Mariña lucense.

A empresa Calvo, con factoría en Carballo, tamén mantén a súa actividade, con todos os protocolos de seguridade indicados polas autoridades sanitarias, como o mantemento de distancia adecuada ou vestiario e equipos de seguridade e organizando quendas do persoal que traballa na planta de produción.

FERROATLÁNTICA

Mentres, nas fábricas de ferroaleacións en Cee e Dumbría de Ferroatlántica mantense a actividade, pero Alfonso Mouzo, representante do comité de empresa, sinala que non saben "que vai pasar".

Mouzo explica que hai tres fornos parados e dous en marcha. Así, fixéronse dous grupos de traballo, un fai unha quenda de 14 días e o outro permanece en casa. Agora toca que se reincorporen os que estaban no seu domicilio, pero hai empregados "de risco" se se contaxia, xa que conta "con patoloxías previas". As centrais de Ferroatlántica seguen activas ao ser esenciais.

Precisamente, o presidente da Xunta, Alberto Núñez Feijóo, queixouse este martes da falta de "seguridade xurídica" para empresas electrointensivas de metalurxia e siderurxia como poidan ser Celsa ou Megasa que "queren seguir traballando" pero están a parar.

ERTE

Galicia rexistra un total de 27.797 Expedientes de Regulación Temporal de Emprego (ERTE) con 145.656 traballadores afectados, segundo datos da Xunta deste martes.

A alza de expedientes presentados respecto ao luns é do 4,8%, mentres que os traballadores afectados soben preto dun 4%, nunha situación de estado de alarma pola crise do coronavirus.

A nivel autonómico, hai 815 ERTE con 13.487 empregados inmersos. Os que se producen a nivel estatal e afectan a Galicia son 34, sen datos do Goberno galego sobre empregados neste caso.

Por provincias, Pontevedra segue á cabeza con afectados (58.372) en 9.530 expedientes. Mentres, na Coruña hai 48.580 empregados en 10.623 ERTE.

Pola súa banda, en Ourense son 3.445 ERTE que contan con 13.568 traballadores; e en Lugo hai 3.350 expedientes con 11.649 empregados.